Elordanyń №2 Baıqońyr aýdandyq sotynda Arystanbek Muhamedıuly jáne onyń sybaılastaryna qatysty istiń kezekti otyrysy ótti, dep habarlaıdy QazAqparat tilshisi.
Ulttyq mýzeıdiń burynǵy dırektory Arystanbek Muhamedıuly sot aldyndaǵy sońǵy sózin aıtty.
Bir jyldan astam qazaqstandyqtar jáne álem «Altyn adam» kórmesine qatysty qylmystyq istiń barysyn baqylap keledi. Bıyl 17 sáýirde sottyń alǵashqy otyrysynda men aıtqam, Memleket basshysynyń tapsyrmasyn oryndaý maqsatynda men Úndistannan «Altyn adamdy» elge aman-saý alyp keldim. Elshilik basqa da quzyrly organdardyń kómegimen lokdaýnnyń dál aldynda qundy dúnıeni Qazaqstanǵa jetkizdik. Men zań buzǵan joqpyn jáne kinámdi tolyq moıyndamaımyn. Ony buǵan deıin de aıtqam, - dedi ol.
Sondaı-aq, taǵylǵan aıyptardyń bireýi de dáleldenbegenin aıtyp otyr.
Osydan 2 aı buryn bastalǵan sot prosesi meniń ǵana emes, basqa da aıyptylardyń sózderiniń shynaıylyǵyn kórsetti. Meniń shynaıylyǵymnyń dáleli – aıyptaý aktisiniń jańa tujyrymy. Onda prokýror urlaý, sóz baılasý jáne zańdy buzý faktileri boıynsha birde-bir dálel keltirmeıdi. Barlyq shaqyrylǵan kýágerler qarjy jymqyrý faktisiniń bolmaǵanyn aıtty. Eshqandaı zańsyz áreketterdiń joqtyǵyn senimdi túrde qaıtalady, - dedi Arystanbek Muhamedıuly.