Arys qalasynda jalpy halyqtyń qarjylaı qoldaýymen jáne saýapty iske jumyla qalatyn jomart jandardyń demeýshiligimen sáni men sáýleti jarasqan záýlim meshit ashyldy.
Bir mezette 2000 adam qulshylyq jasaı alatyn ǵıbadathananyń ashylý saltanatyna Qazaqstan musylmandary dinı basqarmasynyń tóraǵasy, bas múftı Naýryzbaı qajy Taǵanuly, Arys qalasynyń ákimi Gúljan Qurmanbekova, meshit salýǵa atsalysqan kásipkerler men aqsaqaldar jáne qala turǵyndary qatysty.
Saltanatty jıyn QMDB-nyń tóraǵasy, bas mýftı Naýryzbaı qajy Taǵanulynyń qasıetti Quran Kárimdi tıláýat etýimen bastaldy. Ári qaraı, qurmetti qonaqtar ret-retimen sóz alyp, júrekjardy lebizderimen bólisti.
Qala ákimi Gúljan Qurmanbekova meshittiń salynýyna úles qosqan azamattar men kásipkerlerdiń uıymshyldyq kórsetip, az ýaqytta meshitti tapsyryp otyrǵanyna alǵys aıtty. Jastarǵa ımandylyq tárbıe berip, asyl dinimizdi nasıhattaıtyn qutty mekenge aınalady dep senim bildirdi.
Jańa meshitke dinı basqarmanyń sheshimimen «Háziret Ábý Bákir ás-Syddyq» ataýy berilip, Bas múftıdiń buıryǵymen Berik Úısinbaev ımam bolyp taǵaıyndaldy.
Aıta keteıik, jańa meshittiń minájat zaly 1500 sh.m. quraıdy. Qurylys sáýleti ulttyq naqyshpen turǵyzylǵan. Qala irgesinde, toǵyz joldyń torabynda ornalasqan ǵıbadathanaǵa árqaısysy bıiktigi 33 metr bolatyn tórt munarasy, úlkendi-kishili 17 kúmbezi ornatylǵan. Meshittiń taǵy bir ereksheligi munarasy – Mádınege, qubylasy Mekkege baǵyttalypty. Úsh qabattan turatyn meshitte bir mezette 2 myń adam qulshylyq ete alady. Munda úlken zalǵa ilingen lústrada 99 jaryqsham qoıylǵan. Bul Allanyń 99 esimine oraılastyrǵan. Budan bólek, munda konferensıa zaly, kitaphanasy, dárisqanalar, bir úlken áıelder zaly, neke jáne ımamdar bólmesi bar. Sonymen qatar 100 avtokólikke arnalǵan avtoturaqqa oryn bólingen. Meshit aýmaǵynda 150 kisige arnalǵan asqanasy da qarastyrylǵan.
Qudaı úıin jańa kilemmen jabdyqtaýǵa meshittiń soǵylýyna úlken demeýshilik tanytqan belgili kásipker Balqıa Baltabaı atsalysqan. Ol salmaǵy 9 tonnaǵa jýyq bolatyn, óte sapaly, qoı júninen toqylǵan kilemdi óz qarjysyna Túrkıadan arnaıy aldyryp, syıǵa tartty.
Sonymen qatar, jańa meshit janynan 300 balaǵa arnalǵan «Áz Táýke han» qarılar daıyndaý ortalyǵy (jataqhanasymen), sport kesheni, tálim berýshi ustazdarǵa arnalǵan 6 qyzmettik úı men adal meıramhana, sondaı-aq 300 oryndyq qyzdar medresesi ornalasqan.