Oljas Bektenov pen inDrive qyzmetiniń negizin qalaýshy Arsen Tomskıı sıfrly ındýstrıany damytý máselelerin talqylady, dep habarlaıdy aqshamnews.kz
Qazaqstan Premer-Mınıstri Oljas Bektenov inDrive jahandyq kólik jáne qala qyzmetteri platformasynyń negizin qalaýshy jáne SEO Arsen Tomskıımen kezdesti. Sıfrly ındýstrıanyń ózekti máseleleri talqylanyp, qazaqstandyqtardyń turmys sapasyn jaqsartý maqsatynda jańa sheshimder engizý perspektıvalary qaraldy.
Qazaqstanda sıfrly ekojúıe qurylǵan, Ortalyq Azıadaǵy IT startaptardyń iri halyqaralyq tehnoparki jumys isteıdi, kreatıvti sheshimderge belsendi túrde qoldaý kórsetilýde. Ulttyq jasandy ıntellekt ortalyǵyn qurý jumystary júrgizilip jatyr.
«Memleket basshysy Joldaýda sıfrlandyrý salasyndaǵy jumysty jandandyrýdy tapsyrdy. Bul – basym mindet. Qazaqstan ekonomıka qurylymyndaǵy sıfrly tehnologıalar úlesin ulǵaıtýdy jáne IT qyzmetter eksportyn odan ári arttyrýdy maqsat etip otyr. Biz ishki naryqta iri IT kompanıalardyń bolýyn quptaımyz», — dep atap ótti Oljas Bektenov.
Óz kezeginde Arsen Tomskıı birlesken sıfrly platformalardy engizýge jáne ıntellektýaldy ındýstrıany damytýdaǵy yntymaqtastyqqa qyzyǵýshylyq tanytty. Atap aıtqanda, inDrive Qazaqstanda IT, bilim berý, ǵylym, óner jáne basqa da baǵyttar boıynsha bilikti mamandardy daıarlaıtyn 400 adam bilim alatyn inVision U ýnıversıtetin ashý týraly usynys jasady.
Sonymen qatar kompanıa iri megapolısterde aýa sapasyn jaqsartý boıynsha birqatar ekologıalyq bastamany iske asyrýdy josparlap otyr. Birinshi joba Almatyda júzege asyrylady. Úkimet basshysy tıisti memlekettik organdarǵa qoǵamdyq jobaǵa kómek kórsetýdi tapsyrdy.
Kezdesý qorytyndysy boıynsha eńbek prosesteriniń zańdylyǵy men ashyqtyǵyn, sondaı-aq jol qaýipsizdigin qamtamasyz etýdiń mańyzy atap ótildi. Sondaı-aq inDrive Qazaqstannyń platformalyq jumyspen qamtý jónindegi bastamasyn qoldaıdy.
Anyqtama:
inDrive álemniń 46 eliniń 750 qalasynda qyzmet kórsetedi. Kompanıa 2021 jyly quny mıllıard dollardan asqan kompanıalar tizimine enip, biregeı mártebege qol jetkizdi. 2022 jyly kompanıanyń keńsesi Almatyǵa kóshirildi. Qazirgi ýaqytta Qazaqstandaǵy inDrive keńsesinde 800-ge jýyq adam jumys isteıdi.