Tergeý úshin arnaıy komısıa quryldy.
«ArselorMıtall Temirtaý» AQ-nyń eki basshysy tórt jumysshynyń qaza bolýyna baılanysty qamaýǵa alyndy. Bul týraly Qaraǵandy oblysynyń Polısıa departamenti málim etti, dep habarlaıdy Almaty-akshamy.kz QazAqparatqa silteme jasap.
«QR QK-niń 277-babynda kózdelgen qylmys jasady degen kúdik boıynsha jınalǵan materıaldardy eskere otyryp, jumys qaýipsizdigine jaýapty eki basshy ustaldy. 19 maýsymda Temirtaý tergeý soty atalǵan adamdarǵa qatysty kúzetpen ustaý túrindegi bultartpaý sharasyn sanksıalady», - dep habarlady Qaraǵandy oblysy polısıa departamentiniń baspasóz qyzmeti.
Vedomstvodan málimdegendeı, tergeý úshin arnaıy komısıa quryldy, olar óndiristegi kisi ólimine baılanysty ispen aınalysady.
«Qylmystyq isti tergeý barysynda kásiporyn qyzmetkerleri, onyń ishinde óndiristegi qaýipsizdik tehnıkasy úshin jaýapty adamdardan jaýap alyndy», - dep atap ótti Polısıa departamentinen.
Esterińizge sala keteıik, 2022 jyldyń 10 maýsymynda «Qurylysmet» JSHS («AMT» AQ enshiles kásiporny) sehynyń jumys istemeıtin № 9 termıalyq peshinde otqa tózimdi qalaýdy bólshekteý kezinde shatyr opyrylyp qulaǵan bolatyn.
Nátıjesinde bes jumysshy úıindiler astynda qaldy. Olardyń tórteýi mert boldy, bireýi aýrýhanaǵa jetkizildi.