AQSH-tyń Aýǵanstan boıynsha arnaıy ókili Tomas Ýest Aýǵanstan boıynsha S5+1 arnaıy sesıasyna qatysý úshin Astanaǵa keldi.
QR Syrtqy ister mınıstrligi alańynda ótken sesıa aıasynda Qazaqstan, Qyrǵyzstan, Tájikstan, Túrikmenstan, Ózbekstan jáne AQSH ókilderi gýmanıtarlyq kómek kórsetý, adam quqyqtaryn qorǵaý, Aýǵanstanmen halyqaralyq yntymaqtastyq, sondaı-aq qaýipsizdikti qamtamasyz etý jáne terorızmge qarsy kúres boıynsha birqatar máselelerdi talqylady, dep habarlaıdy Almaty-akshamy.kz.
Qazaqstan tarapynan qatysqan QR Syrtqy ister mınıstrliginiń Erekshe tapsyrmalar jónindegi elshisi Talǵat Qalıev Aýǵanstandaǵy jaǵdaıdy turaqtandyrý máselesine biryńǵaı kelisilgen pragmatıkalyq kózqarastyń mańyzdylyǵyna sesıaǵa qatysýshylardyń nazaryn aýdardy.
AQSH-tyń arnaıy ókilin Qazaqstan Respýblıkasy Syrtqy ister mınıstriniń birinshi orynbasary Qaırat Omarov qabyldady. Kezdesý barysynda amerıkalyq tarap Qazaqstan Úkimetiniń aýǵan halqyna kómek kórsetý boıynsha qabyldap jatqan sharalaryn quptap, áleýmettik-ekonomıkalyq jaǵdaıdy turaqtandyrý sharalaryn atap ótti.
Q.Omarov Qazaqstan Aýǵanstanǵa kómek kórsetý jáne eldegi kúrdeli gýmanıtarlyq daǵdarystan shyǵý joldaryn izdeý boıynsha halyqaralyq kúsh-jigerdi biriktirýdi jaqtaıtynyn atap ótti. Atap aıtqanda, QR Prezıdenti Qasym-Jomart Toqaevtyń Ortalyq Azıa men Aýǵanstan elderiniń áleýmettik-ekonomıkalyq jáne saýda-ınvestısıalyq damytý salalaryndaǵy yntymaqtastyǵyn ilgeriletýge baǵyttalǵan Almatyda BUU-nyń Aımaqtyq turaqty damý ortalyǵyn qurý týraly bastamasyna nazar aýdaryldy.
Aıta ketý kerek, C5+1 – 2015 jyly qurylǵan aımaqtaǵy bes eldiń (Qazaqstan, Qyrǵyzstan, Tájikstan, Túrikmenstan jáne Ózbekstan) AQSH-pen saýda-ekonomıkalyq jáne ózara múddedegi basqa da salalardaǵy ózara is-qımyly jónindegi aımaqtyq dıplomatıalyq platforma.