20-dan astam tintý sharalary júrgizildi
İİM Uıymdasqan qylmysqa qarsy kúres departamenti Qyzylorda qalasyndaǵy krımınogendik jaǵdaıǵa yqpal etken qylmystyq toptyń jolyn kesti, dep habarlaıdy Almaty-akshamy.kz Polisia.kz-ke silteme jasap.
Qylmystyq topqa qatysýshylardyń qylmysyn áshkereleý boıynsha ótkizilgen arnaıy operasıa barysynda polısıa organdaryna 10 kúdikti jetkizildi. Olar kúzet qyzmetinde ózderi yqpalyn júrgizetin aýmaqtardy bóliske salý úshin birneshe ret qylmystyq qaqtyǵystarǵa qatysqan.
Oıyn-saýyq oryndarynda ádeıi janjal týǵyzyp, sol oryndardyń ıelerin ózderiniń qamqorlyǵyn qabyldaýǵa májbúr etken. Qylmystyq toptyń birqatar aýyr jáne asa aýyr qylmystar jasaýǵa, sonyń ishinde kisi óltirýge oqtalý, aýyr dene jaraqattary men buzaqylyq jasaýǵa qatysy bar ekeni anyqtaldy.
Sonymen qatar olar áleýmettik jelilerde qoǵamdyq oryndarda atys qarýyn qoldanatyn beınerolıkterdi birneshe ret jarıalap, ózderiniń shamadan tys erkinsip ketkenderin kórsetti. 20-dan astam tintý sharalary júrgizildi, oq-dáriler, sýyq qarý jáne basqa da zattaı dáleldemeler tárkilendi. Sotqa deıingi tergeý jalǵasýda.