Bul týraly Qazaqstan Respýblıkasynyń Tótenshe jaǵdaılar mınıstri general-maıor Syrym Sháriphanov Almaty qalasynyń Óńirlik komýnıkasıalar qyzmetiniń brıfıńinde habarlady. Búgin mınıstr beısenbi kúni Almatynyń ortalyǵynda bolǵan órt ornynda boldy, dep habarlaıdy almaty-akshamy.kz
TJ Mınıstri Syrym Sháriphanov órttiń negizgi sebepteri men mán-jaıyn tergeý boıynsha arnaıy komısıa qurylǵanyn aıtty. Komısıa quramyna TJ jáne densaýlyq saqtaý mınıstrlikteriniń, quqyq qorǵaý organdarynyń, Almaty qalasy ákimdiginiń ókilderi jáne basqa da múddeli bólimsheler kirdi.
Buǵan deıin habarlanǵandaı, memlekettik órtke qarsy qyzmet bólimsheleri quramynda 46 órt sóndirýshi qutqarýshy men 13 tehnıka jeti mınýt ishinde oqıǵa ornyna shuǵyl jetti. Órt qysqa ýaqyt ishinde sóndirilip, oqshaýlandy.
"Jumys qıyndaı tústi: tar joldar, tynys ala almaıtyn orta, qalyń tútin. Munyń bári órtti sóndirý, barlaý júrgizý jáne úı-jaılardaǵy adamdardy jyldam izdeý prosesin qıyndatty. Jertólede jınalyp turǵan kóp ortopedıalyq matras órt jaǵdaıyn qıyndatty. Jertólede bolǵandardyń órtten qashý múmkindigi óte az boldy. Sonymen qatar, bul matrastar órtenip, janyp, qalyń tútin basty ", - dedi mınıstr.
TJ Mınıstri atap ótkendeı, bul ǵımarat bir jarym aı buryn hostelge zańsyz aınaldy. Sondaı-aq, hostelge aınaldyrylǵan bólmeler sanıtarlyq jáne qurylys normalaryna saı bolmady.
Sonymen qatar, qala ákimdigi órt kezinde zardap shekkenderge kómek kórsetti. Baspanasyz qalǵandar kórshi jataqhanalarǵa ornalastyryldy. Birqatar zardap shekkender aýrýhanaǵa jatqyzyldy jáne olarǵa medısınalyq mekemelerde tıisti kómek kórsetiledi.
"Sondaı-aq, osy jataqhanada ornalasqan stýdentter baspanaǵa muqtaj ekendikterin málimdemegenin jáne oqý orny men ákimdikke baspanaǵa muqtaj ekendikterin jáne osy jataqhanada ornalasatyndyǵynan habardar etpegenin atap ótkim keledi. Iaǵnı, bul jataqhananyń bar ekendigi týraly ákimdikte, basqa organdarda, sonyń ishinde TJD-da aqparat bolǵan joq. Sondaı - aq, TJD men basqa da memlekettik organdardyń shaǵyn bıznes sýbektilerin tekserý is-sharalaryn júrgizýge quqyǵy joq ekenin atap ótkim keledi", - dep tolyqtyrdy S.Sháriphanov.
Sońynda mınıstr arnaıy komısıa órttiń shyǵý sebepterin tekserýge, bolǵan órt úshin kináli jáne jaýapty laýazymdy tulǵalardy anyqtaýǵa kiriskenin atap ótti. Bul oqıǵaǵa kináliler jaýapqa tartylady.