Belgili zańger Meıirman Shekeev kompozıtor Arman Dúısenovtiń jary Aısulý Aıdanqyzyna quqyqtyq kómek kórsetetinin jarıalady. Bul týraly ol áleýmettik jelidegi jeke paraqshasynda málimdedi, - dep habarlaıdy Aqshamnews.kz tilshisi.
Zańgerdiń aıtýynsha, Aısulýmen áńgimeleskennen keıin is boıynsha birqatar kúmándi jaıttar anyqtalǵan.
"Áýeli joldasy Armannyń, odan keıin balasy Abylaıdyń qazasy, endi mine sot qalǵan otbasy múshelerin úıden shyǵarý týraly sheshim de shyǵarǵan. Maǵan usynylǵan qujattardy zerdeleı otyryp,bul istiń kóleńke jaqtary óte kóp ekenin ańǵardym. Bir otbasyna sonshama aýyrtpashylyqtyń birden tónýi árıne qıyn jaǵdaı. Mundaı kezde keshegi jaqyndary alystap,qıyndyqpen kóp jaǵdaıda jalǵyz qalatyny ras,dese de,Aısulý hanymdy qarapaıym halyq jalǵyz qaldyrmaıyq", – dep jazdy Shekeev.
Aıta keteıik, keıingi aılarda Arman Dúısenovtiń otbasy birinen keıin biri aýyr oqıǵalardy bastan ótkerip, kópshiliktiń de, qoǵam ókilderiniń de nazarynda tur.