Óńirlik komýnıkasıalar qyzmetiniń alańynda aldyn ala epıdemıalyq maýsymdaǵy JRVI men tumaýdyń aǵymdaǵy epıdemıologıalyq jaǵdaıy men profılaktıka is-sharalary týraly brıfıń ótti. Almaty qalasy sanıtarıalyq-epıdemıologıalyq baqylaý departamenti basshysynyń orynbasary Ásel Qalyqova qalada maýsymdyq jaǵjaıǵa qaramastan, syrqattaný deńgeıi turaqty bolyp otyrǵanyn habarlady.
Departament derekterine sáıkes, 45-aptada Almatyda 23 786 JRVI jaǵdaıy tirkeldi, bul 100 myń turǵynǵa shaqqanda 1012,89-dy quraıdy jáne ótken jyldyń osy kezeńimen salystyrǵanda 18,7%-ǵa, al aldyńǵy aptamen salystyrǵanda 18,9%-ǵa joǵary. Aýrýlardyń 63%-dan astamy – balalar. Stasıonarlarǵa 519 pasıent, onyń ishinde 64 júkti áıel jáne 1 jasqa deıingi 66 bala gospıtalızasıalandy. «Pnevmonıa» dıagnozymen 79 adam aýrýhanaǵa jatqyzylǵan.
«Jańa epıdmaýsym bastalǵaly barlyǵy 113 390 JRVI jaǵdaıy tirkeldi, syrqattanýshylyq kórsetkishi 4828,55 boldy, bul ótken jyldyń osy kezeńimen salystyrǵanda 9,6%-ǵa joǵary. Aýrýshańdyqtyń 58,6%-y – balalar arasynda. Barlyǵy 2428 pasıent, onyń ishinde 255 júkti áıel jáne 1 jasqa deıingi 333 bala aýrýhanaǵa jatqyzyldy», – dedi Ásel Qalyqova.
Almatyda tumaýdyń A/H3N2 shtammynyń 13 rastalǵan jaǵdaıy anyqtaldy, olardyń basym bóligi – ekpe almaǵandar. Naýqastardyń kópshiligi júkti áıelder. Barlyq pasıentter em qabyldap jatyr, dárigerler olardyń jaǵdaıyn qanaǵattanarlyq dep baǵalaıdy.
Qalalyq zerthanalar tumaý jáne basqa JRVI vırýs túrleriniń aınalymyn baqylaýdy jalǵastyryp jatyr. Zerttelgen 609 úlginiń 13-inde A/H3N2 vırýsy anyqtaldy. Sondaı-aq rınovırýs, paragrıpp jáne maýsymdyq koronavırýs aınalymda ekeni tirkelgen.
Oqýshylar arasyndaǵy syrqattanýǵa jeke nazar aýdaryldy. 45-aptada 172 mektepte 602 JRVI jaǵdaıy tirkeldi, bul jalpy oqýshylar sanynyń nebári 0,3%-yn quraıdy jáne shekti deńgeıden aspaıdy. Aýrýdyń aldyn alý maqsatynda barlyq mektepte tańerteńgi jáne aýysymaralyq súzgi jasalady.
Ásel Qalyqova Almatynyń tumaý men aýyr respıratorlyq ınfeksıalar boıynsha jyl boıy jumys isteıtin dozorlyq epıdqadaǵalaý júrgizetin óńirlerdiń biri ekenin eske saldy. Qalada stasıonarlyq jáne ambýlatorıalyq segiz dozorlyq ortalyq jumys isteıdi.
Epıdmaýsymǵa daıyndyq aıasynda qalada qajetti qaýlylar ázirlenip, medısına qyzmetkerlerine oqý semınarlary ótkizildi, emhanalarda fıltr-aımaqtar quryldy, tumaý men JRVI-dy anyqtaıtyn PTR-jınaqtardyń qory qamtamasyz etildi.
25 qyrkúıekten bastap halyqty vaksınasıalaý bastaldy. Búgingi tańda 254 115 adamǵa ekpe salyndy, onyń 250 myńǵa jýyǵy – qaýip tobyna jatatyndar. Jekemenshik ortalyqtarda vaksınasıa qalaǵan barlyq turǵynǵa, sonyń ishinde jumys berýshiler esebinen qoljetimdi.
«Jekemenshik medısınalyq ortalyqtarda tumaýǵa qarsy ekpeni aqyly túrde halyqtyń basqa toptary da ala alady, oǵan túrli sala qyzmetkerlerin jumys berýshiler esebinen vaksınasıalaý da kiredi. Aqyly túrde 4115 adam egildi, olardyń 2146-sy – jumys berýshilerdiń qarajatyna, 1969-y – óz qarajaty esebinen», – dedi Ásel Qalyqova.
Brıfıń sońynda maman turǵyndarǵa JRVI men tumaýdyń aldyn alýdyń negizgi is-sharalaryn eske saldy:
• ımýnıtetti kóterý: S dárýmenin qoldaný, dáriger nusqaýymen oksolın maıyn paıdalaný;
• kópshilik jınalatyn oryndarǵa barýdy qysqartý, úı-jaıdy jeldetip, ylǵaldy tazalaý, JRVI-ben aýyratyndarmen qarym-qatynastan aýlaq bolý, qajet jaǵdaıda maska taǵý, jeke gıgıena erejelerin saqtaý;
• syrqattanǵan jaǵdaıda úıde bolý, ózin-ózi emdemeý, medısına qyzmetkerin shaqyrý, jótelgende jáne qaqyrǵanda aýyzdy qolmen, salfetkamen nemese oramalmen jabý, qoldy jıi jýý;
• naýqas balalardy mektepke, balabaqshaǵa jáne mádenı-buqaralyq oryndarǵa jibermeý.