Batyrlar rýhy – otanshyldyq tárbıeniń negizi
Búgin, 19 sáýir kúni Almatyda ardagerler men jastar bas qosqan dóńgelek ústel ótti. Onda II dúnıejúzilik soǵys kezindegi qazaq batyrlarynyń erligi eske alyndy. Ári qazirgi jastarǵa jáne jalpy qoǵamǵa otanshyldyq tárbıe berý máseleleri talqylanyp, usynystar ortaǵa salyndy dep habarlaıdy almaty-aqshamy.kz.
Jıynda qalamyzdaǵy ardagerler men jastar uıymdarynyń ókilderi bas qosty. Dóńgelek ústel «Qazaq batyrlarynyń erligi men ar-namys dástúri – Qazaqstan jastaryn áskerı-patrıottyq tárbıeleýdiń negizi» degen taqyrypta ótti. Qatysýshylar halqymyz basynan ótkergen soǵystardy, olardyń tarıhı baǵasy týraly talqy óristetip, qazaq batyrlarynyń erlik rýhyn búgingi jastarǵa áskerı-patrıottyq tárbıe berýde qandaı ról atqaratynyna toqtaldy.
Sondaı-aq, dóńgelek ústel basynda Qazaqstan Respýblıkasynyń Prezıdenti Qasym-Jomart Toqaevtyń 15 naýryzda Atyraý qalasynda ótken Ulttyq Quryltaıdyń úshinshi otyrysy sheńberinde bastamalaryna qatysty talqy óristetti. Ǵylymı-saraptamalyq talqylaý barysynda jastardy áskerı-patrıottyq tárbıeleýde qazaq batyrlarynyń erligi men ar-namysy dástúrleriniń sabaqtastyǵyn saqtaý, sondaı-aq, olardy qazirgi bilim berý jáne ǵylymı-mádenı salanyń evolúsıasy prosesterine ıntegrasıalaý tetikteri syndy ózekti taqyryptar da baıandama jasaldy.
İs-sharaǵa tarıhshy ǵalymdar, jetekshi saıasattanýshylar men áleýmettanýshylar, azamattyq qoǵam men memlekettik organdardyń ókilderi, ardagerler men jastar uıymdarynyń ókilderi qatysty. Shara tizginin QR ǴJBM ǴK FSDI Saıası zertteýler ortalyǵynyń dırektory Aıdar Ámrebaev ustady. Almaty qalasy Ardagerler keńesiniń tóraǵasy, QR UǴA korespondent múshesi Ahan Bıjanov, atalǵan Saıası zertteýler ortalyǵynyń jetekshi ǵylymı qyzmetkeri Dına Eshpanova syndy aǵa býyn ókilderi taqyrypty keń qamtı otyryp baıandama jasady.
Baıandama kezeginde Naýryzbaı aýdany Ardagerler keńesiniń tóraǵasy Mádenıet Kárkenov qazirgi kezdegi otan qorǵaý, el súıgishtik, el bolashaǵynyń qamyna jumys isteý rýhyn sonaý Qazaq handyǵy kezindegi batyrlyq rýhty dáripteýden bastaý kerek ekenin alǵa tartty. Ol óziniń «Qazaq tarıhy partrıottyq tárbıe kenishi» atty baıandamasynda áıgi Abylaı han men Buhar jyraýdyń dıalogyn mysalǵa keltire otyryp, elimiz uzaq bolashaǵyn qazirden oılap, alysty kózdeýi kerek degen usynysyn ortaǵa saldy. «Erteńniń talaby, búginniń armany» ustanymy qazirgi jastarǵa otanshyldyq tárbıe berýde basty nazarda bolýy kerek degen oıyn ortaǵa tastady.
Talqy ústelinde sóz alǵan Almaty qalasy «Jastar rýhy» jastar qanatynyń tóraǵasy Ákejan Keńesov qoǵamda otanshyldyq sezimdi jetildirýde urpaqtar sabaqtastyǵynyń mańyzy zor ekenin, aǵa býynnyń baısaldy aqyly men jastardyń jastyq maksımalızmin ushtastyrǵanda ulttyq ıdeologıa men ulttyq biregeılik syndy asa mańyzdy máselerdi sheshýge bolatynyn jetkizdi.
- «Búgingi kezdesý aıryqsha formatta ótti. Ardagerler men jastardyń basyn qosa otyryp, erkin formatta ótkeni mańyzdy. Taqyryby da ózgeshe, ıaǵnı búgingi patrıottyq tárbıe máselesin talqylap jatyrmyz. Men óz tarabymnan talqy barysynda jastar ortalyǵynda jasalyp jatqan jobalardy tanystyryp ótti. Aıtalyq, ulttyq biregeılik, otanshyldyq baǵytynda «Meniń elim, menik tilim» jobasy júzege asyp jatyr. Bir jyldan astam ýaqyt boldy «Sóıle – speaking» jobasynda biz memlekettik tildi ózge ult ókilderine úıretý, ortaq kezdesýler ótkizip, basqalardyń qazaq tilin meńgerýine qolaıly orta jasaýdamyz. Baıqaǵanymyzdaı bul tamasha nátıje berip jatyr», – deıdi Ákejan Baqytuly.
Jastar ortalyǵynyń jetekshisi budan bólek, qoǵamda tereń teris áserge ıe vandalızmge qarsy aksıalardy ótkizip kele jatqanyn, sondaı-aq, urpaqtar sabaqtastyǵyn damyta túsetin «Ardagerlerimizdi aıalaıyq» syndy jobalaryn talqy barysynda tanystyryp ótti.
Aıta keteıik, aýqymdy ári ózekti taqyryptardy talqylaǵan maǵynaly sharany QR ǴJBM ǴK Fılosofıa, saıasattaný jáne dintaný ınstıtýtynyń Saıası zertteýler ortalyǵy, Almaty qalalyq ardagerler Keńesiniń basshylyǵy jáne Almaty qalasynyń ákimdigi uıymdastyrǵan bolaty.