Almaty oblysy Talǵar aýdany Nura aýyldyq okrýginde 9 mamyr –Jeńis kúni merekesine oraı qandy maıdanǵa qatysqan maıdangerler men tyl ardagerlerin eske alýǵa arnalǵan is-shara ótti. Atalmysh sharaǵa aýyldyq okrýg ákimdigi, aýyl aqsaqaldary men turǵyndary qatysty, dep habarlaıdy Almaty-akshamy.kz.
Aldymen Nura aýyldyq okrýgi ákimdiginiń qyzmetshileri ardagerlerdi úılerine baryp quttyqtap, qundy syılyqtar tabys etti. Aýyl ákimi Danıar Kúngeı beıbit kúndi syılaǵan ardagerlerge óz alǵysyn bildirdi. Týǵanbaı aýylyndaǵy Uly Otan soǵysyna qatysýshylarǵa arnalǵan eskertkishke baryp, dúnıeden ótken ardagerlerge quran baǵyshtady. Jergilikti asqanada arnaıy as berildi. Sharanyń sońy aýyldyń áıgili aqsaqaly ataqshy shopan, Uly Otan soǵysynyń ardageri, Eńbek eri Kúnbolat Seıitovtyń qurmetine arnalǵan fýtbol týrnırimen jalǵasty. Fýtbol alańyna irgeles aýyldardan kelgen komandalar jınaldy. Nátıjesinde týǵanbaılyq fýtbolshylar birinshi oryndy jeńip aldy, ekinshi oryndy Nura aýylynyń sporshylary mise tutty. Úshinshi oryndy aralas jastar quramasy ıelendi.
Bul týrnır tek bizdiń atamyzdy eske alýǵa arnalǵan týrnır emes. Bul on segizde ot keship, surapyl maıdanǵa attanǵan barlyq aýyldyń ardagerlerine arnalady. Osy týrnır arqyly biz erjúrek ata-babalarymyzdyń erligin dáriptep, jastardy otansúıgishtik pen patrıotızmge tárbıeleýdi maqsat ettik. Atalmysh týrnır aýylda jyl saıyn ótkiziletin sharalardyń qatarynda bolady,- dedi batyrdyń nemeresi Azamat Seıitov.
Aıta keteıik, jeńimpazdarǵa baǵaly syılyqtar men aýyspaly kýbok saltanatty jaǵdaıda tabys etildi.