Qazirgi ýaqytta Qyzylorda oblysy aýmaǵynan 900 tekshe metrdeı sý óte bastaǵan. Aral mańyndaǵy Qambash jáne Aqshataý kólder júıesi qaıta qalpyna keldi.
Ótken jyly bul jerlerdi qýańshylyq jaılaǵan. Endi Aqlaq sý tospasy arqyly retteletin toǵyz kól júıesin sýlandyrý kózdelgen. Ol úshin tıisti sharalar qolǵa alyndy. Búginde Syrdarıa ózenine de mol sý túse bastaǵan, dep habarlaıdy Almaty-akshamy.kz
«SARATS-1» jobasy iske asqannan keıin teńiz deńgeıin 42 metrge deıin kóterýge múmkindik týdy. Alaıda ótken jyly Syrdarıa ózeni arqyly Kók Aralǵa tıisti kólemdegi sý túsken joq. Soǵan baılanysty qazir teńiz deńgeıi 80 sm tómen. Degenmen ózen bastaýyndaǵy qar men muz kúrt erip, jaýan-shashynnyń kóbeıýine baılanysty sońǵy kúnderi Qyzylorda oblysy aýmaǵyna mol sý kele bastaǵan.
«15 sáýirge deıin osy sý oblys kóleminen aǵyp ótip, soltústik Aral teńizine barady dep otyrmyz. Onyń ózi osyndaı jaýyn-shashynnyń, ózendegi sýdyń esebinen bolyp otyr. Egin bastalǵanǵa deıin soltústik Aral teńizine belgili bir mólsherde sý kólemi beriledi», - deıdi Aral-Syrdarıa baseındik ınspeksıasynyń basshysy Seıilbek Nurymbetov.
Ótken jyly Aral aýdanyndaǵy Burmaqulaq bógetin bekitkennen keıin, Qambash jáne Aqshataý kólder júıesi burynǵy qalpyna keldi. Birer kún buryn Aqalaq sý tospasy da jabyldy. Osylaısha, Qaratereń eldi mekeni mańyndaǵy kólderdi sýlandyrý josparlanǵan.
«Búgingi kúnge sýdyń deńgeıi 51,45-ke jetip otyr. Bizdiń jospar sol deńgeıdi 53-ke jetkizý. Qazir sý torabynyń aldyna sý jınaqtalyp jatyr. Bizde segiz kanal bar, solar arqyly irili-usaqty toǵyz kólge sý beriledi», - deıdi «Qazsýshar» RMK Qyzylorda fılıalynyń bólim basshysy Aıdos Asanbaev.
Mamandardyń aıtýynsha, egin naýqany bastalǵanǵa deıin óńirdegi sý arnalaryn tolyp, shabyndyqtardy nárlendirýge úlken septigin tıgizedi.