Sý resýrstary jáne ırrıgasıa mınıstri Nurjan Nurjigitov Arab úılestirý tobynyń ókilderi – Saýd Damý Qorynyń (SFD) bas dırektory Sultan Abdýlrahman ál-Marshadı jáne OPEK qorynyń prezıdenti, doktor Abdýlhamıd Alhalıfamen ekijaqty kezdesý ótkizdi, dep habarlaıdy aqshamnews.kz sala mınıstrligine silteme jasap.
Nurjan Nurjigitov yntymaqtastyq múmkindikteri men júzege asyrýǵa bolatyn jobalardy talqylady. Atap aıtqanda, sheteldik ınvestorlarǵa Sý salasyn damytýdyń 2024-2028 jyldarǵa arnalǵan keshendi josparynda kózdelgen sý sharýashylyǵy nysandaryn salý jáne rekonstrýksıalaý jónindegi jumystar týraly aıtyp berdi.
Mınıstr ınvestorlarǵa sý salasyn, jerasty sýlaryn avtomattandyrý jáne sıfrlandyrý, toptyq sý qubyrlaryn qaıta jańǵyrtý jáne maman daıarlaý salasyndaǵy yntymaqtastyq múmkindikterin de qarastyrýdy usyndy. Sonymen qatar, taraptar Qazaq sý sharýashylyǵy ǵylymı-zertteý ınstıtýtynyń, Sý resýrstary aqparattyq-taldaý ortalyǵynyń jáne Ulttyq gıdrogeologıalyq qyzmettiń materıaldyq-tehnıkalyq bazasyn jaqsartý máselesin talqylady.
Sheteldik ınvestorlar óz kezeginde mınıstrliktiń jobalaryna qatysýǵa daıyn ekendikterin bildirdi. Taraptar talqylaýdy birlesken jumys toptary sheńberinde jalǵastyrýǵa kelisti.
«Biz Islam damý bankimen kelissózder hattamasyna qol qoıdyq. Osy arqyly Qazaqstannyń sý salasyna qomaqty ınvestısıa ákeletin kelisimderdi ázirleý jáne oǵan qol qoıýǵa múmkindik beretin kelesi kezeńge óttik. Memleket basshysy elimizdiń sý salasyna ınvestısıa tartýdyń mańyzyn atap ótti, sondyqtan biz halyqaralyq qarjy ınstıtýttarymen belsendi kelissóz júrgizip jatyrmyz», – dedi Sý resýrstary jáne ırrıgasıa mınıstri Nurjan Nurjigitov.