Memleket basshysynyń bıylǵy Joldaýy – elimizdegi qarapaıym eńbek adamdary úshin úlken serpilis boldy. Prezıdentimizdiń 2025 jyldy «Jumysshy mamandyqtarynyń jyly» dep jarıalaýy – kásibı bilim men tehnıkalyq mamandyqtarǵa jańa serpin beretin, eńbektiń qadirin arttyratyn mańyzdy qadam. Bul bastama – elimizdegi óndiristik, aýyl sharýashylyq, qurylys, kólik jáne ózge de salalarda aıanbaı eńbek etip júrgen myńdaǵan jumysshy mamandardyń mártebesin arttyrý jolyndaǵy jarqyn bastaý ekeni sózsiz.
Osyndaı ıgi bastamalar kásibı-tehnıkalyq bilim berý oshaqtarynyń da jaýapkershiligin arttyryp otyr. 55 jyldyq tarıhy bar Almaty qurylys-tehnıkalyq koleji – elimizdiń ekonomıkalyq damýyna serpin beretin bilikti mamandardy daıarlaý isinde aıtarlyqtaı úles qosyp kele jatqan bilim ordasy. Kolej qabyrǵasynda búginde 9 túrli mamandyq boıynsha bilim alýshylar zaman talabyna saı bilim men tájirıbeni qatar meńgerip, básekege qabiletti maman bolyp qalyptasyp keledi.
Jýyrda «Jumysshy mamandyqtarynyń jyly» aıasynda ótken «Qazaqstan kolejderiniń Úzdik 100 stýdenti» respýblıkalyq baıqaýynda kolejimizdiń stýdenti, «Dánekerleý isi» mamandyǵynyń ókili Shabarov Nurlybek Baıǵalıevıch úlken jetistikke qol jetkizdi. Bul jeńis – bir ǵana stýdenttiń emes, búkil ujymnyń, ustazdar men stýdentterdiń ortaq eńbeginiń jemisi. 
Nurlybektiń jetistigi – kásibı mamandyqtyń bedelin arttyrýǵa qosylǵan úlken úles. Ol baıqaý barysynda óziniń mamandyǵyna degen súıispenshiligin, kásibı sheberligi men keleshekke degen senimin barynsha kórsete bildi. Búgingi tańda dánekerleý isi – elimizde joǵary suranysqa ıe, asa qajetti jáne tabysty mamandyqtardyń biri. Metaldy dánekerleý – sheberlikti, dáldikti, shydamdylyq pen uqyptylyqty qajet etetin, naǵyz óner dep aıtýǵa turarlyq jumys.
Bizdiń kolej stýdentteri óndiristik tájirıbeden Krones syndy iri kompanıalarda ótip, kásibı mashyqtaryn shyńdaýda. Tamaq ónerkásibine arnalǵan jabdyqtardy sapaly dánekerlep, el ekonomıkasynyń damýyna óz úlesterin qosyp jatqandary – ustaz úshin eń úlken maqtanysh.
Búgingi jahandaný dáýirinde ýaqyt talabyna saı sapaly maman bolý – zor jaýapkershilik. Bul jolda árbir stýdent úzdiksiz izdenip, óz bilimin damytyp, tańdaǵan isin súıe bilýi tıis. Kásipke adaldyq pen eńbekke degen mahabbat – tabysty bolashaqtyń negizi.
«Eń ońaı jumys – óziń súıetin is» demekshi, men jas urpaqqa myna bir qarapaıym, biraq asa mańyzdy oıdy jetkizgim keledi: mamandyq tańdaý – tabysqa jetýdiń joly emes, ózińdi tabýdyń joly. Aqsha men ataq emes, qyzyǵýshylyq pen nıet shynaıy jetistikke jeteleıdi. Ár mamandyqtyń óz qadiri, ár eńbek adamynyń óz orny bar.
Biz, ustazdar qaýymy, el bolashaǵyn tárbıelep otyrǵanymyzdy tereń sezinemiz. Bolashaq – eńbekqor, bilimdi, kásibı sheber mamandardyń qolynda. Sondyqtan ár mamandyq ıesin qurmettep, jastardy kásiptik bilimge baýlyp, eńbekke tárbıeleý – basty mindetimiz.
Almaty qurylys - tehnıkalyq kolejiniń
Arnaıy pán oqytýshysy Ospanova Nazym Ýálıhanqyzy