Qazaqstan Respýblıkasy Prezıdentiniń keńesshisi – baspasóz hatshysy Berik Ýálı «Qazaq ádebıeti» gazetiniń ujymyn basylymnyń 90 jyldyq mereıtoıymen quttyqtady.
Bul qasıetti shańyraqqa qazaqtyń qaı jaqsysy bas suqpady deısiz?! Keshegi seri Sáken men qulager İlıas, kerbez Ǵabıt pen qara nar Beıimbet atalarymyzdyń aıaǵynyń izi, qalamynyń taby qaldy. Odan keıin de gazettiń basynda qazaqtyń kil arǵymaq uldary, qadirli qalamgerleri otyrdy. Syrbaı Máýlenovten Ázilhan Nurshaıyqovqa, odan Sherhan Murtaza men Saıyn Muratbekovke jalǵasqan salqar kerýen ulttyq ádebıettiń uly kóshin tynbaı alǵa súırep keledi, - dep jazdy ol óziniń Facebook-tegi paraqshasyna.
Sondaı-aq gazettiń qanshama býyndy qalyptastyrǵanyna toqtalyp, 90 jyldan beri taqyryby aýqymdy, talaby bıik, óresi úlken ádebıet qalyptassa, oǵan osy ata basylymnyń eńbegi eresen ekenin atap ótti.
Osy rette Mádenıet jáne aqparat mınıstri Aıda Balaeva da gazettiń alǵash jaryq kórgenine 90 jyl tolýyna oraı óziniń jyly lebizin bildirdi.
Oqyrmanynyń kózaıymyna aınalǵan gazettiń ár beti – tunǵan tarıh, áli de jazary taýsylmaǵan. Memleket basshysynyń bastaǵan reformalary men halyq úshin mańyzdy aqparattaryn qalyń oqyrmanyna talmaı jetkizip, ultymyzdyń tarıhı sana-sezimin jańǵyrtyp keledi. Basylym qoǵamymyzdyń rýhanı azyǵyna aınalyp, jas qalamgerlerdiń shyǵarmashylyǵyn shyńdaıtyn abyroıly alańǵa aınaldy, - dedi mınıstr.
Sonymen qatar, ol ádebı basylym redaksıasy ujymyna taýsylmas shabyt, tolaıym tabys tiledi.