Bala quqyqtary jónindegi ýákil Dınara Zákıeva áleýmettik jelidegi paraqshasynda zańǵa ózgeris engizýdi usyndy, dep habarlaıdy almaty-akshamy.kz
«Prezıdent óz Joldaýynda balalardy zorlyq-zombylyqtan qorǵaýdaǵy mańyzdy mindetterdi aıqyndady. «Men Memleket basshysy retinde kámeletke tolmaǵandarǵa jasalǵan zorlyq-zombylyqtyń kez kelgen túrine qatysty jazany kúsheıtýdi talap etemin». «Bilim berý mekemelerindegi psıhologıalyq qoldaý qyzmetin ınstıtýsıonaldy túrde kúsheıtý qajet. Biryńǵaı senim telefonyn uıymdastyrǵan jón. Zorlyq-zombylyqqa jáne qysymǵa, ıaǵnı býllıngke tap bolǵandarǵa kómek kórsetýge arnalǵan baǵdarlama ázirleý kerek». Bul nelikten mańyzdy? Búgingi tańda zańnamada kúsh kórsetý men qatygezdik tanytýǵa baılanysty áreketterdiń BARLYQ nysanyn qamtıtyn, olar úshin jaýapkershilikti kózdeıtin jeke baptar joq. Quqyq qorǵaýshylar jaýapkershilikke tartý úshin barynsha sáıkes keletin baptardy qoldanýǵa májbúr. Osyǵan baılanysty, biz qaraý jáne talqylaý úshin ázirlenip jatqan sharalardyń qataryna qylmystyq kodekske jazany qatańdata otyryp, kámeletke tolmaǵandarǵa qatysty kúsh kórsetý men qatygezdik tanytýǵa baılanysty is-áreketterdiń barlyq nysandaryn qamtıtyn «Kámeletke tolmaǵandarǵa qatysty zorlyq-zombylyq» babyn qosýdy mańyzdy dep sanaımyz» dep atap ótti Dınara Zákıeva Facebook paraqshasynda.
Onyń aıtýynsha, mysaly, saýda ortalyǵynda balanyń betinen teýip jibergen adamǵa «Buzaqylyq» baby qoldanylǵan.
QR ÁQBtK-degi «Uryp-soǵý» baby balalarǵa is júzinde qoldanylmaıdy.
Qatygez qarym-qatynas úshin qoldanylatyn, áıtse de jaýapkershiligi is-áreketke sáıkes kelmeıtin «Kámeletke tolmaǵan adamdy tárbıeleý jónindegi mindetterdi oryndamaý«atty QR QK 140-baby tárbıeshiler men ata-analarǵa ǵana kózdelgen.
Taǵy bir mysal, ógeı ákesi balany uryp-soǵyp, bala aýrýhanaǵa, sodan soń kámeletke tolmaǵandardy beıimdeý ortalyǵyna tústi. Ógeı ákesiniń bostandyǵy ǵana shekteldi, ıaǵnı ol sol kúıi úıinde tura beredi. Bundaı jaza sondaı áreket jasaǵan adamǵa laıyqty jaza emes.
«Sondaı-aq, taraptardyń tatýlasýyn, sondaı-aq azaptaýǵa, zorlyq-zombylyqtyń kez-kelgen túrine, balalarǵa qatygezdik tanytýǵa qatysty qylmystar úshin bas bostandyǵyn shekteý sıaqty jaza túrin alyp tastaýdy qarastyrǵan jón. Qatygezdik tanytqany úshin jaza taǵaıyndalmaýy kóbinese odan da aýyr qylmystarǵa ákep soǵady. Mundaı áreketti jasaǵan adam jazanyń qatal ekenin bilýi kerek. Bul rette balalarǵa qatygezdik tanytý, olarǵa qatysty zorlyq-zombylyqqa baılanysty is-áreket jasaǵandardyń barlyǵyn psıhologıalyq kómek kýrsyn ótýge mindetteý kerek. Zorlyq-zombylyqqa ushyraǵan balalardy anyqtaýda, olarmen jumys isteýde psıhologtar basty ról atqarady. Búginde 13 oblysta mektepterdiń psıhologıalyq qyzmetterin oqytýmen, úılestirýmen, sapasymen aınalysatyn psıhologıalyq qoldaý ortalyqtary joq. Osyǵan baılanysty QR Prezıdentiniń Joldaýyna sáıkes bilim berý mekemelerindegi psıhologıalyq qoldaý qyzmetin ınstıtýsıonaldy túrde kúsheıtý bul máseleni sheshedi» deıdi ombýdsmen.
Dınara Zákıevanyń sózine qaraǵanda búginde zorlyq-zombylyq qurbany bolǵan balalarǵa kómek kórsetýdiń biryńǵaı baǵdarlamasy joq.
Ata-analar advokat, zańgerlik keńesti óz betinshe izdep júr. Biryńǵaı senim telefonyn qurý zorlyq-zombylyqtyń aldyn alý men anyqtaýdyń negizine aınalady, álemdik tájirıbede bundaı telefon – eń tıimdi quraldardyń biri.
Ár bala kez kelgen sátte kómekke júgine alatyn nómirdi jatqa bilýi kerek. Bul boıynsha Prezıdent tapsyrmasymen QR SDIAÓM-men jumys júrip jatyr.