Elimizdegi aqyly joldarda avtokólik jyldamdyǵyn ólsheıtin qurylǵylar ornatylyp jatyr. Bul týraly Indýstrıa jáne ınfraqurylymdyq damý mınıstrligi Avtomobıl joldary komıteti tóraǵasynyń orynbasary Amangeldi Bekov aıtty, dep habarlaıdy Almaty-akshamy.kz QazAqparatqa silteme jasap.
«Respýblıkalyq mańyzy bar joldardyń boıynda 94 arnaıy kamera ornattyq. Qazir sonyń 33-i iske qosyldy. Jol-kólik oqıǵalarynyń kóbi jyldamdyq talaptaryn saqtamaý saldarynan bolady. Sondyqtan İshki ister mınıstrligimen birlese joldardyń boıynda tıisti qurylǵylardy ornatý jumystaryn qolǵa aldyq. Astana men Býrabaı aralyǵynda osyndaı kameralar iske qosylǵan. Osy oraıda avtokólikpen tym qatty júrgenderge aıyppul salynyp jatyr», - dedi A. Bekov Ortalyq komýnıkasıalar qyzmetindegi baspasóz máslıhatynda.
Onyń aıtýynsha, avtobanda saǵatyna 140 shaqyrym jyldamdyqpen júrýge ruqsat etilgen. Alaıda keıbir júrgizýshiler saǵatyna 180-200 shaqyrym jyldamdyqpen júredi.
«Qala ishinde «Sergek» kameralary jyldamdyqty ólsheıtinin bilesizder. Osy oraıda endi respýblıkalyq joldarda da osyndaı júıe iske qosylyp jatyr», - dedi Komıtet ókili.
Onyń sózine qaraǵanda, aldaǵy ýaqytta osyndaı kameralardyń sany artady.
«Respýblıkalyq mańyzy bar 25 myń shaqyrym joldyń 11 myń shaqyrymy aqyly bolady. Osy joldarda atalǵan kameralardy iske qosamyz. Bul qurylǵylar 2030 jylǵa deıin ornatylady», - dedi Amangeldi Bekov.