Monopolıasyzdandyrý jáne yqtımal shyǵyndy óteý maqsatynda Almaty ákimdigine kompanıa ıelerinen «Almaty spestehparkıng servıs» JSHS-niń 70% mólsherindegi úlesin jáne «Alan Parking» JSHS-niń 100% úlesin qala menshigine qaıtarý týraly usynys tústi, dep habarlaıdy Almaty-akshamy.kz.
«Almaty spestehparkıng servıs» JSHS biryńǵaı operator retinde qalanyń 5 aýdanynda (Almaly, Bostandyq, Jetisý, Medeý, Túrksib) ornalasqan trotýar turaqtaryna qyzmet kórsetýge mamandanǵan. Ákimdikke osy JSHS-niń 30% tıesili.
«AlanParking» JSHS 3 aýdanda (Alataý, Bostandyq, Jetisý) ornalasqan alańdaǵy avtoturaqtarǵa qyzmet kórsetý jónindegi biryńǵaı operator bolyp tabylady. JSHS tolyǵymen jeke menshikte boldy.
Almaty ákimdigi qoldanystaǵy zańnamaǵa sáıkes, joǵaryda kórsetilgen kompanıalardaǵy úlesterdi qaıtarý týraly tıisti qaýly qabyldady. Búginde aqyly turaq júıesi shtattyq rejımde jumys isteıdi. Qaýlyǵa sáıkes, aqyly turaqtar qyzmetinen túsken barlyq kiris aǵymdaǵy jyldyń 25 sáýirinen bastap qala búdjetine baǵyttalatyn bolady.
Qazirgi ýaqytta Almaty ákimdigi qalanyń turaq aımaǵyn uıymdastyrý jóninde biryńǵaı operator qurý boıynsha jumysty bastady. Qoldanystaǵy zańnamada belgilengen ruqsat berý qujattaryn alý merzimderin, sondaı-aq monopolıaǵa qarsy organdarmen kelisý qajettiligin eskere otyryp, biryńǵaı operator 2022 jylǵy 1 tamyzǵa deıin qurylatyn bolady.
Almaty turǵyndarynyń shaǵymdary negizinde servıs sapasyn arttyrý maqsatynda aqyly turaqtar jumysyn jetildirý úshin keshendi sharalar qabyldanady.
Aldaǵy ýaqytta halyqaralyq tájirıbeni qoldana otyryp, qalalyq turaq keńistigin damytý jáne kósheler men aýlalardy abattandyrý úshin aqyly turaqtardan túsetin túsimderdi paıdalaný tujyrymdamasyn ázirleý josparlanýda. Sondaı-aq, jınaqtalǵan problemalardy sheshý úshin qalada kóp deńgeıli turaqtar salý basymdyqqa ıe bolady.
Almatyda aqyly avtoturaq júıesi alǵash ret 2016 jyly engizildi. Joǵaryda atalǵan kompanıalardyń aqparaty boıynsha, aqyly turaqtardan qarjy aınalymy jylyna orta eseppen 1,4 mlrd teńgeni qurady.
Qazirgi ýaqytta kompanıa basshylaryna qatysty qylmystyq is qozǵaldy jáne búdjet qarajatyn urlaýmen baılanysty tergeý amaldary júrgizilýde.