Anasy naýqas ekenin bilgen
Aqtóbede qylmysker kolonıadan naýqas anasyna qashyp ketken, - dep habarlaıdy Almaty-akshamy.kz Tengrinews.kz-ke silteme jasap.
"Dıapazon" basylymynyń málimetinshe, 36 jastaǵy aqtóbelik aýyr qylmysy úshin 8 jylǵa sottalǵan, ol jazasyn qonys kolonıasynda ótep jatqan. Onda qylmysker qaraýylsyz júrip, jumysqa baryp, keshke oralatyn. Biraq bir kúni ol kolonıadan qashyp ketipti.
Qylmysker ápkesiniń aýlynda ustaldy. Túrmeden qashqany úshin ústinen qylmystyq is qozǵalǵan.
Sotta er adam anasy aýyr naýqas ekenin aıtty. Anasy Shubarqudyq aýlynda turady eken, ol kolonıa basshylyǵynan anasyna baryp-qaıtýǵa múmkindik berýin ótingen, biraq ótinishin qabyldamaǵan. Aqyrynda qylmysker kolonıadan qashýǵa bel býǵan. Aqtóbede bir táýlikke páter jaldap, keıin aýylǵa anasyna barǵanyn, artynsha ápkesine barǵan kezde ustalǵanyn aıtty.
Basylym málimetinshe, ol burynǵy qylmysy úshin jazasynyń basym bóligin ótegen, tek 4 aıy qalypty. Biraq sot qashyp ketkeni úshin ony 1 jylǵa bas bostandyǵynan aıyrdy. Qonys kolonıasynan ol eń joǵary qaýipsizdiktegi mekemege aýystyrylady.