Fermer jábirlenýshiniń ishine pyshaq salǵan
Aqtóbe oblysy Alǵa aýdany Qarabulaq aýylynyń ákimi kóz jumdy. Oqıǵanyń qalaı bolǵanyn oblystyq PD baspasóz qyzmeti aıtyp berdi, dep habarlaıdy Almaty-akshamy.kz QazAqparatqa silteme jasap.
Aqtóbe oblysy, Alǵa aýdany, Qarabulaq aýylynyń ákimi Ernar Mahambetovtiń qaza bolǵany týraly aýyl halqy biledi.
Qarabulaq aýyly ákimdigine habarlasqanymyzda, oqıǵany rastady.
Alaıda ákimdikte mán-jaıdy aıtyp beretin maman joq ekenin, ózderi de naqty habar ala almaǵanyn aıtty.
«Sizge aqparat beretin adam joq. Munda eki-aq adam jumys isteıdi. Biri - ákim, ekinshisi - maman. Ákimge qatysty aqparatty estip otyrmyz. Oqıǵanyń mán-jaıyn naqty bilmeımin. Jalpy, aýylda negizi 500 adam turady», - dedi Qarabulaq aýyly ákimdiginiń ókili.
Al oblystyq densaýlyq saqtaý basqarmasy ákimniń pyshaq jaraqatyn alyp, kóp qan joǵaltqanyn aıtty.
Aýdandyq aýrýhanaǵa jetkizgen kezde onyń kóz jumǵany belgili bolǵan.
Oblystyq PD baspasóz qyzmetiniń habarlaýynsha, oqıǵa 12 jeltoqsan saǵat 00:50-de bolǵan.
Alǵa aýdany PB 102 nómirine sharýa qojalyqtarynyń birinde adam ólimi tirkelgeni týraly habar tústi.
«Oqıǵa ornyna jiberilgen jedel tergeý toby sharýa qojalyǵynyń basshysy men 36 jastaǵy er adam arasynda janjal bolǵanyn anyqtaǵan. Onyń barysynda fermer jábirlenýshiniń ishine pyshaq salǵan. Oqıǵa saldarynan 36 jastaǵy er adam qaıtys boldy. Osy fakt boıynsha QR QK 99-babynyń 1-bóligimen qylmystyq is qozǵaldy. Qajetti saraptamalar taǵaıyndaldy, kúdikti qamaýǵa alyndy»,- dep habarlady oblystyq PD baspasóz qyzmeti.
Aıta keteıik, Ernar Mahambetov 1986 jyly Aqtóbe oblysy, Alǵa aýdany, Qarabulaq aýylynda dúnıege kelgen.
Eńbek jolyn 2012 jyly Aqtóbe oblysy, Muǵaljar aýdany, Aqkemer aýyldyq okrýginiń jetekshi mamany bolyp bastaǵan.
2014 jyly Aqkemer aýyldyq okrýgi ákiminiń apparatynda bólimshe basshysy mindetin atqarǵan.
2019 jyldyń 2 sáýir aıynan beri Alǵa aýdany Qarabulaq aýyldyq okrýgi ákimi bolyp eńbek etti.