Jetisý oblysynda Aqsýdaǵy sport kesheninen bólek 5 sporttyq saýyqtyrý kesheni bar
Respýblıka kúni qarsańynda Jetisý oblysy Aqsý aýylynda zamanaýı sport kesheni el ıgiligine berildi. Atalmysh nysan aqsýlyq mesenat Aıdyn Súleımenniń demeýshiligimen salynyp otyr. Nysanda bir mezgilde 180 bala sportpen shuǵyldana alady, - dep habarlaıdy Almaty-akshamy.kz Jetisý oblysy ákiminiń baspasóz qyzmetine silteme jasap.
Sport kesheniniń ashylý saltanatyna Jetisý oblysy dene shynyqtyrý jáne sport basqarmasynyń basshysy Almat Úshkempirov, aýdan ákiminiń orynbasary Ǵazız Otarbaıuly, aýyl turǵyndary qatysty.
Quny 350 mln. teńge bolatyn qurylys jumystaryn «Stroı montaj vektor» jaýapkershiligi shekteýli seriktestigi júrgizdi. Keshende 4 jattyǵý zaly bar desek, olar túgeldeı qajetti sporttyq jabdyqtarmen qamtylǵan. Iaǵnı aýyl balalarynyń basketbol, voleıbol, shaǵyn fýtbol, boks, ústel tenısi, toǵyzqumalaq, qazaqsha jáne erkin kúrespen aınalysýyna múmkindik jasalǵan. Nysanda bir mezgilde 180 bala sportpen shuǵyldana alady.
- Buǵan deıin balalar erkin kúresten aýyldaǵy Mamanıa mektebiniń sport zaly bazasynda jattyǵyp keldi. Olardy aýdandyq balalar men jasóspirimder sport mektebinen bólingen maman jattyqtyratyn. Endi kúrespen qatar basqa da sport túrlerine qyzyqqan balalar osy kesheniniń arnaıy zaldarynda shynyǵatyn bolady. Shtatqa jattyqtyrýshylar sport mektebinen tartylady, - dedi Aqsý aýdandyq buqaralyq sporttyq is-sharalardy ótkizý ortalyǵynyń dırektory Asqat Saýǵanbaev.
Keshen jastardy salamatty ómir saltyna baýlyp qana qoımaı, ýaqytty tıimdi paıdalanýǵa, tabandylyq pen tózimdiligin shyńdaýǵa múmkindik bermek. Aqsý aýylynyń turǵyndarynyń ortalyqta bolashaq chempıondar ósip shyǵaryna senemderi mol.
Jalpy qazir Jetisý oblysynda Aqsýdaǵy sport kesheninen bólek 5 sporttyq saýyqtyrý kesheni bar. Bıyl oblysta taǵy 8 sport nysanynyń qurylysy júrip jatyr. Sonyń ishinde Alakól aýdanyndaǵy Dostyq jáne Lepsi aýyldarynda dene shynyqtyrý-saýyqtyrý kesheni, Alakól aýdany Beskól aýylynda, Panfılov aýdany Úlken Shyǵan, Penjim aýyldarynda sport keshenderi salynýda.