Kúndelikti kúıbeń tirshilikte janymyzǵa jylý syılaıtyn sátter bolady. Áriptesim Raıa Eskendir ekeýimiz jol-jónekeı Seıfýllın dańǵyly men Qurmanǵazy kóshesiniń qıylysyndaǵy áleýmettik dárihanaǵa bas suqqan edik. «Gazet oqyńyz, ishinde Almatynyń sońǵy jańalyqtary bar!», – degen ádemi, jarqyn daýys eleń etkizdi. Burylyp qarasaq, kasa artynda turǵan jas qyz qolyna bizdiń súıikti basylym – «Almaty aqshamyn» ustap, oqyrmanǵa usynyp jatyr eken.
Jaqyndap tanyssaq, esimi – Rahıma Týrýsova. Qarapaıym satýshy-konsýltant qana emes, naǵyz elgezek, elge janashyr jan ekeni birden bilindi. Óz isine uqypty, sóılegen sózi jyly, júregi meıirimge toly. Baspasózge, aqparatqa degen qurmetin kórip, eriksiz qýanyp qaldyq. Mádenıettiliktiń belgisi. Mundaı jandardy gazetimizdiń kórinbeıtin janashyry, basylym men oqyrman arasyndaǵy altyn kópir deýge ábden bolady.
Rahıma syndy ulttyq basylymǵa janashyr jastar kóbeıse eken. Olar basylymnyń rýhanı qunyn arttyryp qana qoımaı, qalanyń tirshiligin, jańalyǵyn kópke jetkizýge úles qosyp júr. «Almaty aqshamy» – qala ómiriniń aınasy. Al ony oqyrmanǵa usynatyn, osyndaı shynaıy janashyrlar – bizdiń eń basty tiregimiz.