Qaýipsizdik sarapshylarynyń pikirinshe, arzan taýarlar nemese qyzmetter «satý» sıaqty sqema alaıaqtar keńinen qoldanylatyn ádisterdiń biri. Aldaýdy tanyp, kıber urylardyń qarmaǵyna túspeı, qalaı únemdeýge bolatyny jaıly aıtyp bereıik.
Bul óte qarapaıym, biraq tıimdi sqema. Oǵan júzdegen qazaqstandyq tap bolady, dep habarlaıdy Almaty-akshamy.kz Stopfake.kz-ke silteme jasap.
Ol qalaı jumys isteıdi?
Alaıaqtar ónimdi nemese qyzmetterdi óte tómen baǵamen satylymǵa shyǵarady. Olar arnaıy saıttarda paıdalanylǵan taýarlardy «satady» nemese taýarlary qolda bar Instagram dúkeni retinde qyzmet etýi múmkin. Sqemada ártúrli kýrstar, trenıńter nemese suranys joǵary basqa qyzmetter de usynylady.
Eger baǵa tym arzan bolsa, munyń ótirik ekenin bári túsinedi emes pe?
Keıde ǵana. Ádette, alaıaqtar áleýetti klıentterge «biz tikeleı jetkizýshilermiz», «qoımadaǵy zattar satylýda» jáne t.b. aıtady. Iaǵnı, olar baǵanyń tómendigi ónimniń sapasyzdyǵyna baılanysty emes, buǵan basqa da sebepter bar ekenine kóndiredi. Al kýrstar nemese basqa qyzmetter usynylsa, onda alaıaqtar jappaı satylym, sýper-aksıanyń sońǵy kúni dep aıtýy múmkin.
Satýshynyń senimdi ekenine kóz jetkizý úshin ónimniń fotosýreti men vıdeosyn suraı alamyn
Bul qaýipsizdikke kepildik bermeıdi. Alaıaqtar fotosýretter men vıdeolardy Jeliden alady nemese satyp alýshy retinde osyǵan uqsas ónimdi satýshylardan suraýy múmkin.
Alaıaqtar aqshany qalaı alady?
Klıent alaıaqtarǵa senip, satyp alýǵa daıyn bolǵan kezde, olar taýar úshin aldyn ala tólem jasaýyn suraıdy. Ádette olar taýardyń bir ǵana danasy qaldy, ony alam deýshiler kóp, sondyqtan oǵan «bron» qoıý úshin tólem jasaý kerek deıdi. Eger klıent tolyq qunyn tóleýge kelispese, onda alaıaqtar munymen toqtamaı, aldyn-ala tólem retinde baǵanyń belgili bir bóligin suraıdy.
Kartadan aqsha aýdarǵanym kórinip turady. Olaı bolsa, men ony qaıtara alamyn ba?
Bul keıbir jaǵdaılarda ǵana múmkin bolady. Qarjylyq qaýipsizdik jónindegi maman Damır Nurıtdınov túsindirgendeı, kartadan kartaǵa aqsha aýdarý qandaı da bir qyzmet kórsetýdiń nemese taýar satýdyń kepili bolyp tabylmaıdy jáne ol óteýsiz bolyp sanalady. QR Azamattyq kodeksinde negizsiz baıý týraly bap bar. Ol siz qatelesip bireýge aqsha aýdarǵan jaǵdaılarǵa qatysty. Alaıda ony qoldaný úshin sotta qatelik jibergenińizdi dáleldeý kerek.
Eger resmı tólem shotyn surasam bola ma? Bul qaýipsiz be?
Joq. Alaıaqtar basqa bireýdiń jeke kásipkerlik kabınetterin jalǵa alyp, olardyń banktik qosymshalardaǵy shottaryna kire alady. Bul sqema qalaı jumys isteıtini týraly biz buǵan deıin jazǵan bolatynbyz.
Olaı bolsa, satyp alý kezinde qaýipsizdikke qalaı kepildik berýge bolady?
Eger ónimdi qoldan satyp alsańyz, onda satýshymen kezdesip, onyń sapasyn kórip (qolda baryn bilip), baǵalaǵan durys! Eger jańa taýar satyp almaq bolsańyz, ony resmı dúkenderden nemese tekserilgen iri marketpleısterden alǵanyńyz jón, onda satyp alýshylar da, satýshylar da alaıaqtardan qorǵalǵan