AQSH-taǵy menedjerlerdiń 93 paıyzy komandasynyń aptasyna tórt kún jumys isteýine qarsy emes.
AQSH-ta 4 kúndik jumys aptasyna aýysý týraly bastama kóterilip jatyr, dep habarlaıdy Almaty-akshamy.kz 24.kz silteme jasap. Zertteý nátıjeleri boıynsha kóptegen kompanıanyń basshylary tórt táýlik jumys júıesin qoldaıdy eken. Óıtkeni onyń jumys berýshige de jumysshyǵa da tıimdi ekeni anyqtaldy. AQSH-ta jumyssyzdyq deńgeıi áli de tómen. Keıbir kásiporyndar bilikti mamandardan aıyrylyp qalmas úshin jańa erejeni engize bastaǵan.
Ótken aıda Merılend shtaty tórt kúndik jumys aptasyna kóshken kásiporyndarǵa salyqtyq jeńildik qarastyrý jónindegi zań jobasyn usyndy. Eger qujat qabyldansa AQSH-taǵy alǵashqy baǵdarlama bolǵaly tur.
Jalpy, amerıkalyqtar aptasyna 4 táýlik, 10 saǵattan jumys isteýge qarsy emes. Óıtkeni otbasyna, óziniń densaýlyǵyna kóbirek kóńil bóletin bos ýaqyt paıda bolady dep sanaıdy.
«Robert Half» eńbekpen qamtý agenttiginiń zertteýi boıynsha AQSH-taǵy menedjerlerdiń 93 prosenti komandasynyń aptasyna tórt kún jumys isteýine qarsy emes. Olardyń 64 prosenti aldaǵy 5 jylda jańa qysqarǵan júıege kóshýdi josparlap júr eken.
Indıana ýnıversıteti Kellı bıznes mektebiniń dosenti Krıshtıaný Gýarananyń aıtýynsha, tórt kúndik jumys ónimdiligin zertteý jumystary kóp jerde júrgizilip jatyr. Saraptama kórsetkendeı, aptasyna tórt táýlik jumys tártibi kompanıaǵa ǵana emes, onyń qyzmetkerlerine de tıimdi ekenin kórsetken. Sonyń ishinde eń aýqymdy ári naqty zertteýdi Ulybrıtanıa jasady. Túrli saladaǵy 61 kompanıa jáne 3300 qyzmetker dástúrli jumys aptasynan tórt kúndikke aýysqan. Bul kásiporyndar ujymnyń ahýaly men ónimdiligin bilý úshin pılottyq zertteýge qatysqan.
Ulybrıtanıadaǵy zertteý qorytyndysy boıynsha, jańa jumys aptasyna aýysqan kompanıanyń tabysy asa ózgermegen. Qyzmetkerlerdiń eńbek ónimdiligi de tómendemegen. Kerisinshe, qyzmetkerlerdiń sharshaýy azaıyp, uıqysy qanyp, alańdaýshylyq joıylǵan.
«Tájirıbege qatysqan kompanıalarda jumysqa keshigý, kelmeı qalý, syrqatqa baılanysty suranyp ketý sıaqty jaǵdaılar azaıǵan. Qazir kóptegen kásiporyndar osy aptasyna tórt kúndik jumysty talantty mamandardy ustap turý úshin usynatyn bolǵan. Demek kompanıanyń uzaq merzimde jetistikke jetýine qajet tásil sıaqty. Kásipkerler men qarapaıym jumysshylar da pandemıa kezinde qashyqtan jumys isteýdiń tıimdiligin kórdi. Degenmen sarapshylar tórt kúndik jumysqa kóshken kompanıalar áli de sırek ekenin aıtady. Eń bastysy, ár kásiporyn ishki tártibi men eńbek zańdylyǵyn saqtaı otyryp yńǵaıly keste bekitýi kerek», - dep málimdedi Indıana ýnıversıteti Kellı bıznes mektebiniń dosenti Krıshtıaný Gýarana.