AQSH pen Qytaı TikTok áleýmettik jelisine qatysty "negizgi qurylymdyq" kelisimge qol jetkizdi. CNBC jazýynsha, bul týraly AQSH jarjy mınıstri Skott Bessent málimdedi, - dep habarlaıdy Aqshamnews.kz tilshisi Factcheck.kz-ke silteme jasap.
"Bul eki jeke kompanıa arasynda bolyp otyr, komersıalyq sharttary kelisilip qoıǵan", – dedi ol Madrıdte ótken AQSH pen Qytaı arasyndaǵy kelissóz barysynda.
Prezıdent Donald Tramp pen Qytaı prezıdenti Sı Szınpın juma kúni kelisimniń naqty sharttaryn talqylamaq. Tramp Truth Social paraqshasynda jastar "saqtap qalǵysy kelgen" kompanıaǵa qatysty kelisim jasalǵanyn jazdy.
Bessenttiń aıtýynsha, bul kelisim TikTok-tyń AQSH baqylaýyna ótýine jol ashýy múmkin. Al TikTok ázirge túsinikteme bergen joq. Reuters jazýynsha, Qytaıdyń bas saýda kelissózshisi Lı Chengan da kelisimniń bar ekenin rastaǵan ári AQSH-ty qytaılyq kompanıalarǵa qysym jasamaýǵa shaqyrǵan.
Bul málimdemeler AQSH pen Qytaı arasyndaǵy keıingi saýda kelissózderi aıasynda aıtyldy. Sońǵy aılarda tarıfter men saýda shekteýlerine baılanysty eki el arasyndaǵy qatynas shıelenise túsken edi.
TikTok-tyń ıesi ByteDance 17 qyrkúıekke deıin AQSH-taǵy bıznesin satýǵa tıis bolǵan, áıtpese qosymshanyń jumysy el aýmaǵynda toqtatylýy múmkin. AQSH-tyń saýda ókili Djeımıson Grır kelisimge qol qoıý úshin merzimdi sál keıinge qaldyrý qajet bolýy múmkin ekenin, biraq bul sheksiz sozylmaıtynyn aıtqan.
Byltyr Kongres Apple men Google sıaqty qosymsha dúkenderine TikTok-ty taratýǵa tyıym salatyn zań qabyldaǵan. Tramp qańtarda bul sheshimdi ýaqytsha toqtatyp, ByteDance-ke mámile jasaýǵa qosymsha 75 kún bergen edi. Keıin bul merzim birneshe ret uzartyldy.
Shildede AQSH-tyń saýda mınıstri Hovard Latnık Qytaı AQSH-qa qosymsha avtonomıa bermese, TikTok Amerıkada jabylatynyn málimdegen. Tramp maýsymda Fox News arnasyna bergen suhbatynda qosymshany satyp alýǵa daıyn "asa aýqatty adamdardyń" baryn aıtqan, biraq olardyń esimderi áli jarıalanbady. Buǵan deıin ol TikTok-tyń AQSH-taǵy nusqasyn Oracle basshysy Larrı Ellıson nemese Tesla basshysy Ilon Mask satyp alýy múmkin ekenin de habarlaǵan. Sonymen birge Perplexity jasandy ıntellekt startapy jáne kásipker Frenk MakKýrttiń Project Liberty toby da satyp alýǵa ótinish bergen.