AI-Sana baǵdarlamasy aıasynda elimizdegi bakalavrıat dárejesindegi ár stýdent jasandy ıntellekt kýrstarynan ótedi.
Bul týraly QR Ǵylym jáne joǵary bilim mınıstri Saıasat Nurbek aıtty, - dep habarlaıdy Aqshamnews.kz.
— Prezıdenttiń tapsyrmasymen AI-Sana baǵdarlamasy júzege asyrylyp jatyr. Baǵdarlamanyń maqsaty — stýdentterdi jasandy ıntellektini ekonomıkanyń túrli salalarynda qoldanýǵa úıretý, startap ashýǵa jáne kásipkerlikke baýlý. Bıylǵy aqpan aıynan bastap elimizdegi ár joǵary oqý ornynyń stýdenti jasandy ıntellekt kýrsynan ótýge mindetti bolady. Arnaıy sertıfıkat kýrstaryn Google, Nvidia, Huawei kompanıalary jáne Astana Hub jasaqtaǵan. Qazirgi tańda bakalavrıattaǵy 650 myń stýdenttiń 429 myńnan astamy jáne 3 myńnan astam oqytýshy JI sertıfıkattaryn aldy, — dedi mınıstr Úkimet otyrysynda.
Onyń aıtýynsha, baǵdarlama tórt kezeńnen turady.
— Birinshi, barlyq stýdent Coursera, Huawei jáne Astana Hub platformalarynda jasandy ıntellekt negizderin meńgeredi. Ekinshi, arnaıy baǵdarlama arqyly stýdentter kásipkerlikti, jasandy ıntellektini túrli jobalarda qoldanýdy jáne jańa ıdeıa oılap tabýdy úırenedi. Úshinshi, stýdentter óz jobalaryn jasap, mentorlar men sarapshylardyń qoldaýymen damytady. Tórtinshi, úzdik jobalar startapqa aınalyp, halyqaralyq deńgeıge shyǵady, — dedi Saıasat Nurbek.