Medısına qyzmetkerlerine arnalǵan aleıa
Almaty oblysynda «Aıaýly alaqan» aleıasy ashyldy. Ol Koronavırýs indetimen betpe-bet kúresken aq halatty jandardyń qurmetine arnalǵan, dep habarlaıdy Almaty-akshamy.kz.
Egemen.kz saıtynyń habarlaýynsha, Taldyqorǵan qalasynyń oblys ortalyǵy mártebesin alǵanyna 20 jyl tolýyna oraı, jańa aleıa ashyldy. Oǵan dárigerlerdiń pandemıa kezindegi jankeshti eńbegine alǵys retinde «Aıaýly alaqan» músini qoıyldy. Músinniń bıiktigi - 1,2 m, uzyndyǵy - 3,8 m, eni - 2,8 m.
«Pandemıanyń alǵashqy kúnderinen-aq Elbasy úndeýimen elimiz birigip, indetti jeńýge jumyldy. Qıyn jaǵdaıda medısına qyzmetkerleri aldyńǵy qatarda kúreskenderdiń biri boldy. Búgingi ashylǵan «Aıaýly alaqan» músini asa qaýipti indetpen betpe-bet kelgen medısına salasy qyzmetkerleriniń qurmetine arnalady. Bul – el qurmetiniń belgisi, ystyq yqylasynyń kórinisi. Eskertkish el basyna qıyndyq týǵan sátte qaharmandyq kórsetken jandardyń rýhyna taǵzym etý ornyna aınalady», - dedi Almaty oblysy ákimi ári joba avtory Amandyq Batalov.
İndet kezinde oblystaǵy 31 medısınalyq uıym, ambýlatorıalyq jáne stasıonarlyq deńgeıde 3455 medısına qyzmetkeri jumyldyrylǵan. 900-ge jýyq medısına qyzmetkeri koronavırýspen aýyryp, 14-i kóz jumǵan.