İİM ystyq kúnderi jolǵa shyǵar aldynda qajet bolatyn keńestermen bólisti, dep habarlaıdy Almaty-akshamy.kz.
Aptalyq onlaın-brıfıngi barysynda vedomstvo ókili Shuǵyla Turlybek İshki ister mınıstrligi ystyq kúnderi kólikpen jolǵa shyqqandarǵa myna erejelerdi ustanýǵa shaqyrdy:
- alys qashyqtyqtaǵy saparǵa tańerteń nemese keshke ystyq basylǵan kezde shyǵý;
- medısınalyq kómek qobdıshasy men sýdy júk salǵyshqa emes, ózińe jaqyn jerde ustaý;
- qatty ystyq kezeńde kóktaıǵaqta qozǵalǵandaı aqyryn, saq júrińiz. Sebebi joǵary temperatýra jaǵdaıynda asfált óziniń qasıetterin joǵaltady jáne taıǵaq bolady;
- salqyndatý júıesin únemi baqylap, qozǵaltqyshtyń salqyndatý júıesine kúsh túsirmeý;
- bakty tolyq toltyrmańyz. Óıtkeni, joǵary temperatýrada dızel otyny men benzınniń kólemi ulǵaıady, belsendi býlaný júredi. Sonyqtan mundaı jaǵdaılarda órt shyǵýy múmkin. Osyǵan baılanysty sapar aldynda jaramdy órt sóndirgishtiń bar-joǵyn tekserý qajet;
- júrek-qan tamyrlary jáne sozylmaly aýrýlary bar júrgizýshiler osyndaı ýaqytta jolǵa shyqpaǵany jón;
- jaǵdaıyńyz kúrt nasharlasa, kólikti dereý toqtatyp, basqa júrgizýshilerdiń nazaryn aýdaryńyz nemese jedel járdem shaqyryńyz, qutqarý qyzmetine, polısıaǵa qońyraý shalyńyz.