Osy densaýlyq salasy daýdan arylmady. Bul joly almatylyqtardyń shamyna tıgen negizgi másele kezek kútý jáne 075/ý formasyndaǵy medısınalyq anyqtama, dep habarlaıdy Almaty-akshamy.kz .
- Aýyrmaǵan soń, aq halattylardy izdeı bermeımiz. Ótkende jumys ornymdy aýystyrdym. Álgi jumys ornyma 075/ý formasyndaǵy medısınalyq anyqtama kerek boldy. Ala salaıyn dep tirkelgen emhanama bardym. Tirkeýshi meni birden aqyly bólimge jiberdi. Oılanbastan sonda bardym. Sóıtsem, álgi anyqtamany alý úshin 10 000 teńge tóleýim kerek eken. Sol kezde ne úshin aqyly bólimge jiberdi degen oı keldi. Sodan qaıta tirkeýshige kelip, ol anyqtamany tegin alýǵa ne kedergi ekenin suradym. Sóıtsem, ańqaýlyǵymdy paıdalaný eken. Sonymen qyzyq endi bastaldy. Anyqtama alý úshin ýchaskelik dárigerime barý kerek boldy. Al oǵan kezek kútý kerek, - deıdi Darhan esimdi qala turǵyny.
Tirkeýshi aldymen kezekti naýryzdyń sońyna qoıatyn bolypty. Alaıda turǵynnyń shý shyǵarýynan soń eki kúnnen keıinge kezekke turǵyzǵan.
- Osy aqyly bólim degen adamdy shatastyrady. Qarap turyp, bala-shaǵamnyń aýzynan jyryp on myń teńge bere jazdadym. Bári aqyly bolsa, nege biz memlekettik áleýmettik saqtandyrý qoryna qarajat aýdaramyz. Ol jaqtan bir jelinip, myna jaqtan bir jelinsek...,-deıdi turǵyn.
Shyndyǵy kerek, qala turǵyndary arasynda saýalnama júrgizip kórdik. Jumysqa turý úshin talap etiletin anyqtamany aqyly alatyny basym bolyp shyqty. Al anyqtama 10 000 teńge tura ma? Osy jerde zańdy saýal týyndaıdy. Nege aqyly? Anyqtamany tegin alýǵa bola ma? Sondyqtan máseleniń anyq-qanyǵyna kóz jetkizý úshin «Almaty qalasy qoǵamdyq densaýlyq saqtaý basqarmasy» komýnaldyq memlekettik mekemege joldaǵan saýalymyzǵa tómendegideı jaýap aldyq.
«075/ý formasyndaǵy medısınalyq anyqtama azamattardyń densaýlyǵy týraly beriletin kásibı-klınıkalyq qorytyndy bolyp tabylady. 075/ý formasyndaǵy anyqtama bekitilgen standartqa sáıkes aqyly túrde kórsetiletin memlekettik qyzmet bolyp tabylady».
Al MÁMS máselesine qatysty kelesi jaýapty aldyq:
«2015 jylǵy 16 qarashadaǵy № 405-V QRZ «Mindetti áleýmettik medısınalyq saqtandyrý týraly» Qazaqstan Respýblıkasynyń zańynyń 14-baby 2-tarmaǵy birinshi bóliginiń 9) tarmaqshasynda kózdelgen adamdardy qospaǵanda, qorǵa ózderi úshin aýdarymdar jáne (nemese) jarnalar tólenbegen adamdar mindetti áleýmettik medısınalyq saqtandyrý júıesindegi medısınalyq kómekke quqyq alý úshin qorǵa tólenbegen kezeń úshin, biraq tólem kúniniń aldyndaǵy on eki aıdan asyrmaı, respýblıkalyq búdjet týraly zańda aǵymdaǵy qarjy jylyna belgilengen jalaqynyń eń tómen mólsheriniń 5 paıyzy mólsherinde árbir aı úshin jarnalar tóleýge mindetti ekenin habarlaımyz, - deıdi «Almaty qalasy qoǵamdyq densaýlyq saqtaý basqarmasy» KMM habarlamasynda.
Taqyrypqa oraı
Eki ese arzan
075/ý formasyndaǵy medısınalyq anyqtamaǵa qatysty birneshe jekemenshik medısınalyq ortalyqtarǵa habarlasyp kórdik.
«Azia medical» medortalyǵy anyqtamany 4000 teńgege jasap beredi eken.
«Emır med» ortalyǵy flúorografıańyz joq bolǵan jaǵdaıda 5400 teńgege, egerde qolyńyzda flúorografıańyz bolsa, 3500 teńgege jasap beredi eken.
«Algamed» ortalyǵynda flúorografıaǵa túsiretin apparatynyń joqtyǵyna baılanysty álgi anyqtamany 3500 teńgege jasaıdy eken.
Qaısysy tıimdi ekenin ózińiz baǵamdap kórersiz!..