Sybaılas jemqorlyqqa qarsy is-qımyl agenttiginiń Tóraǵasy Asqat Jumaǵalı Bas prokýratýra janyndaǵy Quqyq qorǵaý organdary akademıasynda alǵashqy kásiptik daıarlyqtyń úshinshi leginiń tyńdaýshylarymen kezdesti.
Áńgimelesý barysynda Agenttik Tóraǵasy organnyń qyzmetine jáne eldegi jemqorlyqqa qarsy is-qımyl boıynsha qabyldanyp jatqan júıeli sharalarǵa toqtaldy, dep habarlaıdy almaty-akshamy.kz. Ol memlekettik organdardyń qyzmetindegi jemqorlyq táýekelderiniń aldyn alý jáne taldaý máselelerine, sondaı-aq jemqorlyqqa qarsy aǵartý jáne qoǵamda jemqorlyqqa tózbeýshilikti qalyptastyrý jónindegi jumystarǵa erekshe nazar aýdardy. Sondaı-aq, A. Jumaǵalı zańsyz shyǵarylǵan aktıvterdi memleketke qaıtarý jáne jemqorlyqqa qarsy kúrestiń tıimdi álemdik standarttary engiziletin zańnamalyq bastamalardy iske asyrý boıynsha aýqymdy jumystar týraly aıtyp berdi.
«Bizdiń jumysymyz qyzyqty. Agenttikte analıtıkalyq áleýet jaqsy damyǵan, taldaýshylar bar. Biz memlekettik organdarmen birge jemqorlyq táýekelderine syrtqy taldaý, ishki monıtorıńter júrgizip, jemqorlyqtyń sebepteri men sharttaryn ashamyz. Negizgi maqsat – qalyptasqan jemqorlyq sqemalarǵa keıinnen basqa sheneýnik kelip otyrmaýy úshin bar sqemalardy ashý. Iaǵnı, eger biz qylmysty anyqtasaq, sońyna deıin jetýimiz kerek, nege jasalǵanyn bilip, osy sqemalar budan ári jumys istemeýi úshin tıisti sharalar qabyldaý kerek», - dep atap ótti Asqat Jumaǵalı.
2023 jyldyń sońynda Akademıada irikteýdiń qujattardy qabyldaý, áńgimelesýden, áskerı-dárigerlik komısıalardan, polıgrafologıalyq tekserýden ótý, emtıhan tapsyrý kezeńderinen ótken 50 kýrsant oqıdy Barlyǵy 546 ótinim berildi, ıaǵnı 10 adam bir orynǵa úmitker boldy. Aǵymdaǵy jyldyń 1 sáýirinen bastap kýrsanttar bir aılyq taǵylymdamadan ótý úshin Agenttiktiń aýmaqtyq departamentterine jiberiledi.
Praktıkalyq sabaqtar aıaqtalǵannan keıin olar Akademıada sońǵy kýrstan ótip, sodan keıin turaqty qyzmetke jiberiledi. Kezdesý qorytyndysy boıynsha Asqat Jumaǵalı tyńdaýshylarǵa tabys tilep, halyq pen memlekettiń ıgiligi úshin adal jáne laıyqty qyzmet atqarýǵa shaqyrdy. Ol olardyń árqaısysynyń jemqorlyqqa qarsy is-qımyl jónindegi ortaq iske qosatyn úlesteriniń mańyzdylyǵyn atap ótti.