Almaty qalasynyń sybaılas jemqorlyq táýekelderi kartasyn iske asyrý megapolıstiń áleýmettik mańyzdy salalaryndaǵy kóptegen sybaılas jemqorlyq táýekelderin anyqtady. Bul týraly Almaty qalasy Sybaılas jemqorlyqqa qarsy qyzmetiniń basshysy Arman Rahımov Óńirlik komýnıkasıalar qyzmetiniń alańynda ótken brıfıń barysynda habarlady.
Almaty qalasynyń Jumyspen qamtý jáne áleýmettik baǵdarlamalar basqarmasynyń qyzmetindegi sybaılas jemqorlyq táýekelderin syrtqy taldaý qorytyndysy boıynsha jumys oryndaryn sýbsıdıalaýǵa bólingen 385 mln. teńge kólemindegi artyq qarajatty qaıtarý sharalary qabyldandy.
Almaty qalasynda jol salýmen aınalysatyn merdiger uıymdardyń qyzmetin taldaý barysynda 4 mlrd. teńgeden astam salyq salý boıynsha buzýshylyqtar anyqtalyp, memleketke 1,3 mlrd. teńge zalal keltirilgeni belgili boldy.
Sonymen qatar, ótken jyly júrgizilgen sybaılas jemqorlyq táýekelderin syrtqy taldaý usynystaryn oryndaý aıasynda zańsyz qurylysqa monıtorıń júrgizý jumystary jalǵasýda. Almaty qalasynyń ákimdigimen birlesip, normatıvtik talaptardy buza otyryp salynǵan 60 qurylys faktisi anyqtaldy.
«Saın kóshesin Rysqulov dańǵylynan Aqyn Sara kóshesine deıingi aralyqta jalǵastyrý» jobasy boıynsha jumystardyń qunynyń asyra kórsetilý faktileri anyqtaldy.
Qabyldanǵan sharalar nátıjesinde joba túzetilip, 1 mlrd. teńgeden astam búdjet qarajaty memleketke qaıtaryldy.
Departament memlekettik satyp alýlar portalynda búdjet qarajatynyń tıimsiz jumsalýyna jol bermeý maqsatynda turaqty monıtorıń júrgizedi. Bıylǵy jyldyń basynan beri memlekettik satyp alýlardy uıymdastyrýshylarǵa hattar jiberý arqyly osy salada 4,1 mlrd. teńge únemdeldi.
«Bızneske jol» jobasy aıasynda 12 (2 júıeli) bıznes sýbektileriniń problemalyq máseleleri sheshilip, 165 kásipkerdiń quqyqtary qorǵaldy.
Sybaılas jemqorlyqqa qarsy mádenıetti qalyptastyrý aıasynda 13 myńnan astam adamdy qamtyǵan 141 túrli is-shara ótkizildi.
Ótken jyldan beri Agenttik «Sybaılas jemqorlyqqa qarsy volonterlik» jobasyn júzege asyrýda, bul jobaǵa Almaty qalasynda 256 erikti qosyldy.
Bıyl eriktilerdiń kúshimen 2,3 mlrd. teńgeden astam búdjet qarajatyn utymsyz paıdalaný aldyn alyndy.
36 áleýmettik nysandar, qurylys jáne jol jóndeý jumystaryna qoǵamdyq monıtorıń júrgizildi.
Departament sybaılas jemqorlyq faktileri týraly habarlaǵan adamdardy yntalandyrý jumysyn jalǵastyrýda.
Bıylǵy jyly 6 azamat kótermelenip, olardyń 4-ýine 4,4 mln. teńge kóleminde aqshalaı syıaqy berildi, 2 memlekettik qyzmetshi alǵys hattarmen marapattaldy.