Túrkıada Baıtursyntaný deńgeıi men ony damytý boıynsha usynystar jasaldy
Ahmet Baıtursynuly qazaqtyń ǵana emes, túbi bir túrki jurtynyń ustazy. Onyń eńbegi týystas halyqtardyń ulttyq bolmysyn oıatty, dep habarlaıdy «Habar 24».
Túrkıalyq ǵalymdardyń pikiri osyndaı. Osy oraıda Ankarada «Ǵasyr ustazy – Ahmet Baıtursynuly» atty dóńgelek ústel ótti. Qazaqstannyń Túrkıadaǵy elshiligi men Halyqaralyq TÚRKSOI uıymynyń uıymdastyrǵan jıyn Alash kóshbasshysynyń 150 jyldyǵyna oraılastyrylǵan. Jıynǵa túriktiń qoǵam qaıratkerleri, kórnekti ókilderi men Ankaradaǵy ýnıversıtetterde bilim alýshy otandastarymyz qatysty. İs-shara barysynda ult ustazynyń ǵumyry men eńbekteri jaıly baıandamalar oqyldy. Túrkıada Baıtursyntaný deńgeıi men ony damytý boıynsha usynystar jasaldy.
«Túrkıamen de Qazaq gazetin shyǵarǵanda baılanystary bolǵan. Ol tańqaldyratyn dúnıe. Qazaq gazetiniń 1914 jylǵy ıanvarynda shyqqan nómirinde Qyzylordadan pálenbaı abonıment, Almaty pálenshe abonentimiz bar, Túrkıadan 13 abonımenti bolǵan qazaq gazetin. 1913 jyly shyqqan gazet, sol ýaqytta Ystambulda 13 abonenti bolǵan. Túrkıalyq zıaly qaýym, Ahmet Baıtursynulynyń jumystaryn qurmetteıdi jáne habardar bolǵan»,-deıdi Eýrazıa jazýshylar odaǵynyń tóraǵasy Iakýp Ómeroǵlu.
«20 ǵasyrda túrki áleminde óziniń ıdentıfıkasıasyn saqtap qalý úshin túrki áleminiń kóptegen jerinde osyndaı áreketter kóremiz. Solardyń biri Alash qozǵalysy. Alash qozǵalysynyń ishinde Ahmet Baıtursynulynyń orny erekshe. Ol tek qazaqqa ǵana emes, búkil túrki álemine tanymal tulǵa. Onyń jazǵan óleńderi, eńbekteri , maqalalary, qazaq gazetin shyǵarýy, qazaq gazetindegi redaktorlyq eńbegi, sondaı-aq joldastarymen jazǵan eńbekteri sol kezdegi qazaq qoǵamynyń ǵana máselesi emes, barlyq túrki áleminde sondaı ortaq máselelerdi kóremiz»,-dedi Hajy Baıram ýnıversıtetiniń profesory Gúljanat Qurmanǵalı Erjılasýn.