Bıyl IýNESKO-nyń sheshimimen Ahmet Baıtursynulynyń 150 jyldyǵy halyqaralyq deńgeıde atalyp ótti
Ankarada Qazaqstannyń Táýelsizdik kúni men qazaqtyń belgili aǵartýshysy, túrkitanýshy-ǵalym, kórnekti memleket qaıratkeri Ahmet Baıtursynulynyń 150 jyldyǵyna oraı Ankara qalasyndaǵy Etımesgýt mýnısıpalıtetinde Ult ustazynyń eskertkishi men parki saltanatty túrde ashyldy.
Bul týraly Almaty-akshamy.kz QR Ǵylym jáne bilim mınıstrliginiń Facebook paraqshasyna silteme jasap habarlaıdy.
Atalǵan sharaǵa Qazaqstannyń Túrkıadaǵy Tótenshe jáne Ókiletti Elshisi Erkebulan Sápıev, Etımesgýt mýnısıpalıtetiniń ákimi Enver Demırel, Astana qalasy ákiminiń orynbasary Eset Baıken, QR Syrtqy ister mınıstriniń ókili Hasan Badjajy, Ankaradaǵy túrkitildes memleketter Elshilikteriniń ókilderi, TÚRKSOI ókilderi, «YDA» holdıń basqarma tóraǵasy Hýseın Arslan, Qazaqstan mádenıet jáne saýda ortalyǵynyń tóraǵasy Ǵanımet Qaısauly, Qazaqstan mádenıet jáne saýda ortalyǵy tóraǵasynyń orynbasary jáne Dúnıejúzi qazaqtary qaýymdastyǵynyń Túrkıadaǵy ókili Erjan Ýáıis, zıaly qaýym, qazaq dıasporasy jáne BAQ ókilderi qatysty.
Jıynda sóz sóılegen Elshi E.Sápıev Qazaqstannyń Táýelsizdik kúni men Ahmet Baıtursynulynyń 150 jyldyǵyna oraı, Ahmet Baıtursynuly atyndaǵy saıabaq pen eskertkishtiń ashylýyna úles qosqan Etımesgýt mýnısıpalıtetiniń tóraǵasy Enver Demırelge jáne qyzmetkerlerine, «YDA» holdıń basqarma tóraǵasy Hýseın Arslanǵa, Astana qalasy ákimdigine alǵysyn bildirdi.
Bıyl IýNESKO-nyń sheshimimen Ahmet Baıtursynulynyń 150 jyldyǵy halyqaralyq deńgeıde atalyp ótkenin, osy rette Elshilik tarapynan da kóptegen mańyzdy is-sharalardyń ótkizilgenin, Ahmet Baıtursynuly qazaq halqyna ǵana emes, kúlli túrik halyqtaryna ortaq tulǵa ekenin, ol Qazaqstannyń bolashaǵy úshin ǵana emes, túrki áleminiń azattyǵy men táýelsizdigi úshin kúresken tulǵa ekenin baıandady.
Túrkıa Astanasy Ankara qalasynda Alash arysy Ahmet Baıtursynuly parkiniń jáne eskertkishiniń ashylýy baýyrlas qazaq jáne túrik halyqtarynyń mádenı-gýmanıtarlyq qatynastarynyń aldaǵy ýaqytta da turaqty damýynyń kórsetkishi bolyp tabylady.