Shaǵymdanýshy – Túrksib aýdandyq memlekettik kirister departamenti.
Sot júıesine tirkelgen is qujattaryna súıensek, Memlekettik kirister departamenti «CDM GRoup» kompanıasynyń burynǵy ıesi Ánıpa Nazarbaeva men qazirgi ıesi Janat Mamrıevanyń ústinen sotqa aryz bergen, dep habarlaıdy aqshamnews.kz
Departament «CDM GRoup» kompanıasynyń jarǵylyq kapıtalyndaǵy 100% úlesti satyp alý – satý shartyn jáne memlekettik qaıta tirkeýdi jaramsyz dep tanýdy suraǵan.
İs 2024 jyldyń 11 qarashasynda bastalǵan, 6 qańtarda alǵashqy sot otyrysy belgilengen. Alaıda alǵashqy sot otyrysyna qatysty qujattar júıede jarıa bolmaǵan.
Egov júıesindegi aqparat boıynsha, «CDM GRoup» kompanıasy 2015 jyly 18 naýryzynda tirkelgen. 2017 jylǵa deıin onyń quryltaıshylary: Ánıpa Ábishqyzy Nazarbaeva men Álı Janbolatuly Qylyshpaev bolǵan. 2017 jyldyń 17 naýryzynda kompanıa qaıta tirkeýden ótip, onyń jańa quryltaıshysy Janat Mamrıeva bolǵan. Sot isine túrtki bolyp otyrǵan osy qaıta tirkeý kezindegi kelisimshart bolýy múmkin. Sebebi Mamrıeva men Nazarbaevany osy kompanıa baılanystyrady. Nazarbaevadan bólek, Qylyshpaevtyń nelikten sottan tys qalǵany belgisiz.
«CDM GRoup» kompanıasy kóterme saýdamen aınalysady. «Bıznes-analıtık» júıesiniń aqparatyna súıensek, 2024 jyldyń jeltoqsanyndaǵy jaǵdaıǵa baılanysty kompanıanyń memleket aldyndaǵy salyq bereshegi 350 613 102 teńgege jetken. Osy kompanıamen bir mekenjaıda (Túrksib aýdany Krasnogvardeıskıı trakti 152D) Janat Mamrıevaǵa tıesili taǵy bir kompanıa tirkelgen. «TDA tranzıt Almaty LTD» kompanıasynyń memleketke salyq bereshegi 318 250 570 teńgeni quraıdy (2024 jyldyń jeltoqsanyndaǵy jaǵdaı boıynsha).