Kóktemgi merekeler qarsańynda Almaty qalasy Alataý aýdany oqýshylarynyń ınovasıalyq shyǵarmashylyq ortalyǵynda búgin erekshe konsert ótti, dep habarlaıdy Aqshamnews.kz
Sahnada óte kishkentaı balalar óner kórsetti. Olar eresekterdeı bar ónerlerin salyp, jerdegi eń qymbat adam - Anaǵa arnalǵan ánder men bılerin oryndady. Óner kórsetken balaqaılar, ózderiniń ynta-jigerlerimen oryndaǵan árbir kórinisterine úlken qoshemetke ıe boldy.
Úsh júz orynǵa eseptelgen CIT konsert zaly lyq toly boldy. «Ana – gúl, ana – jyr, ana – ómir shýaǵy!» – dep atap ótken jas talanttardyń konsertiniń kórermenderi negizinen áıelder qaýymy boldy.
«Biz balalar shyǵarmashylyǵyn damytýǵa ınvestısıa salǵanda, biz bolashaqtyń jańa ıntellektýaldy urpaǵyn qurýdyń negizin qalaımyz. Mundaı is-sharalar balabaqsha tárbıelenýshileriniń qabiletteri men daryndaryn birlesip ashý maqsatynda ata-analar, ustazdar men balalardyń basyn qosady. Sábıler anaǵa degen qurmet pen súıispenshilik sezimderin kórsetedi. Osylaısha, negizgi adamı qundylyqtar sińiriledi», - dedi Almaty qalasy Bilim basqarmasy basshysy Saıran Saıfedenov myrza.
Konsertti Alataý aýdanynyń bilim basqarmasy uıymdastyrdy. Mektep jasyna deıingi balalar ata-analarymen, tárbıeshilerimen jáne balabaqsha meńgerýshilerimen birge «Bir tutas tárbıe» baǵdarlamasy aıasynda 21 konserttik nómir kórsetti.
Balalar monologtar oqyp, án shyrqady. Ánderdi kórermender birge qosylyp oryndady. Ár qoıylymnan keıin kórermender tik turyp qoshemet kórsetti. Keshtiń eń qyzyq qoıylymy qyzdar men olardyń ákeleriniń oryndaýyndaǵy bı boldy. Kórermender qoıylym kezinde sezimge berilip kóz jastaryn tyıa almady.
Uıymdastyrýshylar ýáde etkendeı, mundaı merekelik sharalar turaqty túrde ótkizilip turady.