Prezıdent janyndaǵy Áıelder isteri jáne otbasylyq-demografıalyq saıasat jónindegi ulttyq komısıa áıelderdiń densaýlyǵyn qorǵaý máselelerin jáne ana men bala óliminiń problemalaryn qarady, dep habarlaıdy Almaty-akshamy.kz Inform.kz-ke silteme jasap.
Ulttyq komısıanyń saraptamalyq monıtorıńtik toby óńirlerge baryp, osy máselelerdiń jaı-kúıin egjeı-tegjeıli zerdelep, óz baǵalary men usynymdaryn jetkizgen.
Ulttyq komısıa otyrysyna sarapshylar qaýymdastyǵynyń ókilderi, óńirler ákimderiniń orynbasarlary, ortalyq memlekettik organdardyń basshylary qatysty.
Otyrysqa qatysýshylar aldynda ulttyq komısıa tóraǵasy, Prezıdent Ákimshiligi Basshysynyń orynbasary Aıda Balaeva ana men bala densaýlyǵyn qorǵaý - memlekettik saıasattyń mańyzdy baǵyty ekenin atap ótti. Bul máseleniń jalpyulttyq mańyzy bar jáne memleket iske asyryp jatqan áleýmettik-ekonomıkalyq jáne emdeý-profılaktıkalyq sharalar keshenin tıimdi úılestirýdi talap etedi.
«Ana men balany qorǵaý máseleleri joǵary ózektiligin saqtap otyr. Jergilikti jerlerde ınfraqurylymnyń qoljetimdiligin keńeıtý, táýekel toptardyń habardar bolýy, ýákiletti organdardyń jaýapkershiligin arttyrý talap etiledi. Ana men bala óliminiń aldyn alý keshenin qalyptastyrýǵa jańa tásilder engizý, osy máselelerdi zertteýge qoǵamdyq uıymdardyń resýrstaryn, ǵalymdar men sarapshylardy belsendi tartý mańyzdy. Júktilikti júrgizý jáne anany qoldap otyrý prosesterinde táýekelderdi anyqtaý jáne aldyn alý júıesin jetildirý qajet», - Aıda Balaeva.
Óńirlerdegi monıtorıńtik saraptama tobynyń jumysyn senator Lázzat Súleımen basqardy.
Ulttyq komısıa otyrysynda sóz sóılegen ol bosanatyn áıelder men jańa týǵan náresteler arasyndaǵy ólim-jitimniń ósýiniń negizgi tendensıalaryn atap ótti. Senator óńirlerdegi perzenthanalarǵa, perınataldyq ortalyqtarǵa baryp, qatardaǵy dárigerlermen jáne bosanatyn áıelderdiń ózderimen tikeleı baılanys jasaý barysynda osy máselelerdi egjeı-tegjeıli zerdelegen sarapshylardyń jumysyna toqtaldy.
Akýsherlik, gınekologıa jáne perınatologıa salasyndaǵy sarapshy Záýresh Amanjolova ambýlatorıalyq jáne stasıonarlyq kómektiń oń jáne keıbir problemalyq máselelerin áńgimeledi.
S. Asfendıarov atyndaǵy Qazaq ulttyq medısına ýnıversıtetiniń balalar aýrýlary kafedrasynyń profesory, neonatolog Nıshankúl Bojbanbaeva náresteler ólimin tómendetý boıynsha naqty usynystar jasady.
Densaýlyq saqtaý mınıstri Ajar Ǵınıat aǵymdaǵy jaǵdaı men osy saladaǵy jumys júıesin jetildirý sharalary týraly baıandady.
Aıtylǵan baıandamalar men pikirlerdi eskere otyryp, otyrysqa qatysýshylar ana men balany qorǵaý saıasatyn qaıta júkteý, ortalyq jáne óńirlik deńgeılerde qabyldanatyn sharalardy jetildirý qajettiligi týraly pikir bildirdi.
Ulttyq komısıa basshysy densaýlyq saqtaý mınıstrligine sarapshylar aıtqan eskertýler men usynystardy eskerýdi tapsyrdy.
Ana men bala ólimin azaıtý jónindegi respýblıkalyq jáne jergilikti shtabtardyń jumysyn jandandyrý qajettigi aıtyldy, ony Densaýlyq saqtaý mınıstri men óńirlerdiń ákimderi basqarýǵa tıis.
A.Balaeva shalǵaı eldi mekenderde bosanatyn áıelder úshin qolaıly orta men tıimdi ınfraqurylym qurý qajet ekenin atap ótti.
Sondaı-aq, feldsherlik-akýsherlik pýnktter men dárigerlik ambýlatorıalardaǵy medısınalyq personal tapshylyǵy máselesin medısınalyq joǵary oqý oryndarynyń túlekterin maqsatty bólý arqyly sheshý mindeti qoıyldy.
Dárigerlerdiń kásibı ósýi úshin jaǵdaılardy qamtamasyz etýdiń mańyzdylyǵy jáne onyń bosandyrý kezindegi dárigerlik qatelikterdiń qaýpin azaıtýǵa áseri erekshe atap ótildi.
Densaýlyq saqtaý mınıstrligine Qarjy mınıstrligimen jáne ákimdiktermen birlesip, naqty shyǵyndardy eskere otyryp, bosandyrý qyzmetterine tarıfterdi arttyrý múmkindigin qarastyrý tapsyryldy.
Ulttyq komısıaǵa óńirlik deńgeıde ana men balany qorǵaý salasyndaǵy egjeı-tegjeıli monıtorıńti jalǵastyrý jáne belgilengen mindetterdi sheshý barysyna qoǵamdyq baqylaýdy júzege asyrý júkteldi.