Búgin Almaty qalasynyń Almaly aýdanyna qarasty Bóltirik Atyhanuly atyndaǵy №36 gımnazıada Respýblıka kúnine arnalǵan «Qyran elim, Qazaqstan!» atty merekelik is-shara ótti.
Birtutas tárbıe baǵdarlamasynyń «Táýelsizdik jáne otanshyldyq» jobasy aıasynda uıymdastyrylǵan is-sharaǵa jınalǵan kópshilik mektep oqýshylarynyń ónerin tamashalady.
Jas urpaqtyń otansúıgishtik, ultjandylyq, el men jerge degen qurmetin arttyratyn áserli kesh Memlekettik Ánurandy shyrqaýmen bastaldy.
Iá, talant qyrlaryn ushtap, dúnıeniń tylsym syry men ǵajaıyp sıqyrly kúıin uǵyndyratyn ol árıne, mektep pen ustaz. Jetisý ólkesine shuraıly óleńderimen aqyn, jyrshy, kúıshi retinde tanylǵan Bóltirik Atyhanulynyń esimimen atalatyn №36 gımnazıa ónerli ul-qyzdarǵa baı. Sebebi, bul mektepte shákirtterin ulttyq ónerge baýlyp, túrli aspaptarda oınaýdy úıretetin, rýhanı baıytyp, talanttar tárbıeleıtin kásibı mamandar, tájirıbeli ustazdar kóp.
İs-sharada Qazaqstan Respýblıkasynyń Eńbek sińirgen óner qaıratkeri, M.Maqataev tósbelgisiniń ıegeri, №36 gımnazıanyń «Asyl mura» kórkemsóz úıirmesiniń jetekshisi, ardaqty ustaz Gúlshara Esetovanyń ádebıetke baýlyǵan shákirtteri Árip Ǵalym, Nuraqyn Nurálı, 2 synyp oqýshylary Hadısha Kenjebek pen Aıana Qaırattyń naqyshyna keltirip oqyǵan óleńderi kórkem sózdiń kósegesin kógertti.
Sanıra Qaıranova jetekshilik etetin halyqaralyq, respýblıkalyq, qalalyq baıqaýlardyń jeńimpazy «Tumarhanym» bı ansambliniń bıshileri sahnanyń shyraıyn keltirdi. 4 synyp oqýshysy Kenjebek Abdrahmannyń «Óz elim» dep salǵan áni júregi elim dep soqqan jandardyń janyn tebirentti.
Aqmaral Aqserikova basshylyq etetin №36 gımnazıanyń óskeleń urpaqqa berer tálimi men taǵylymy mol. Baıqaǵanymyz, mektep kúndelikti úzilis kezindegi qońyraý únin kúıge almastyrǵan bilim oshaqtarynyń biri eken. Gımnazıa basshysynyń aıtýynsha, mektepte kúıdiń oınatylýynyń ózindik erejesi qalyptasqan. Máselen, ádettegi sabaq bastalatyn sátte tókpe kúı qoıylsa, al sabaq sońynda shertpe kúı oınaıdy. Ras, mundaı úrdis balalardy mektep qabyrǵasynan eline, jerine degen súıispenshiligin oıatyp, ulttyq ónerimizdiń asyl qazynasyna sýsyndap ósýine jol ashary sózsiz.
– Búgingi is-sharanyń maqsaty – jas urpaqty týǵan jerin, týǵan elin ardaqtaýǵa baýlý, otansúıgishtik ultjandylyqqa tárbıeleý, oqýshylardyń boıynda patrıottyq sezimdi qalyptastyrý. Gımnazıamyzda bilim alýmen qatar, túrli mýzyka aspaptarynyń qulaǵynda oınaıtyn, tamyljyta án salyp, myń burala bı bıleıtin balalar kóp. Shákirtterimiz halyqaralyq, respýblıkalyq baılaýlarǵa qatysyp, júldeli oryndar alyp júr. Munyń barlyǵy ustazdarymyz ben ata-analarymyzdyń birliginiń arqasy, - deıdi gımnazıa basshysy Aqmaral Maǵjanqyzy.
Mereke aıasynda Respýblıka kúnine arnalǵan kórme uıymdastyryldy. Dırektordyń tárbıe isi jónindegi orynbasarlary Serik Serkeshpaev pen Elmıra Isahmetovanyń uıymdastyrýymen ótken merekelik keshtiń sońynda oqýshylar mektep aýlasyna aǵash otyrǵyzdy.
İrgetasy qalanǵaly beri qala mádenıeti men ónerin damytý isine qomaqty úles qosyp, jas urpaqqa sapaly bilim men rýhanı-mádenı tárbıe berý №36 gımnazıa ustazdarynyń eńbegi zor. Bilim oshaǵynyń qala mektepteri arasynda alar orny erekshe, bedeli de joǵary. Búginde elimizdiń túkpir-túkpirinde Qazaqstannyń damýy jolynda qyzmet etip júrgen shákirtterimiz – bizdiń maqtanyshymyz deıdi mektep ustazdary.
Aıta keteıik, 25 qazan kúni elimizde Ulttyq mereke – Respýblıka kúni atap ótiledi. Osy aıtýly kúnniń qurmetine Almaty qalasynda túrli mádenı- is-shara uıymdastyrylady.