Aıaǵyn shalys basyp qylmys jasaǵandardy qoǵamǵa paıdaly adam retinde qaıtarýdyń birden bir tıimdi joly – jumysqa ornalastyrý. Bul oraıda Almaty qalasy boıynsha QAJD-niń qaýipsizdigi barynsha tómen №13 mekemesiniń ákimshiligi sottalǵandardy jumysqa ornalastyrý baǵytynda júıeli jumys júrgizip keledi, dep habarlaıdy Aqshamnews.kz.
Mekemedegi sottalǵandardyń basym bóligi búgingi naryq zamanynda tabystyń kózin tappaı ártúrli qylmysqa urynyp, bas bostandyǵynan aıyrylǵandar. Osyny eskergen mekeme ákimshiligi qaladaǵy kásiporyn basshylarymen kelissózder júrgizip, sottalǵandardy jumyspen qamtýda.
Mekeme ákimshiliginiń osyndaı jumystarynyń nátıjesinde búginde 30 sottalǵan adam Almaty qalasyndaǵy avtoklavty gazdalǵan beton blok shyǵaratyn «Avtoklav kz» zavodyna jumysqa ornalastyrylǵan.
Jýyrda QR Konstıtýsıasynyń 30 jyldyǵyna oraı qabyldanǵan “Raqymshylyq týraly” zańynyń talaptaryna saı atalǵan mekemede jazasyn ótep júrgender bostandyqqa shyǵýda. Solardyń biri «Avtoklav kz» zavodynda jumys istep júrgen Erhan degen jigit. Ol QR Qylmystyq kodeksiniń 193-babymen erekshe qundylyǵy bar, tarıhı zattardy jymqyryp, qylmys jasaǵany úshin 3 jyl 6 aıǵa sottalǵan bolatyn. Erkindikke shyqqan soń da zavod basshylyǵy Erhannyń ózi eńbek etip júrgen sehtaǵy jumysyn jalǵastyrýǵa usynys jasap, ol qazir eseli eńbektiń úlgisin kórsetip júr.