Amerıkalyq bloger ári konservatıv belsendi Charlı Kırkke Iýta alqaby ýnıversıtetinde sóz sóılep turǵan sátinde oq atyldy, - dep habarlaıdy Aqshamnews.kz DW-ge silteme jasap.
Oqıǵa 10 qyrkúıek, sársenbi kúni bolǵan.
Kırk moınynan jaraqat alyp, aýrýhanaǵa jetkizildi.
"Bárimiz Charlı Kırk úshin duǵa etýimiz kerek. Ol keremet jan edi. Qudaı jar bolsyn!" – dep oqıǵaǵa AQSH prezıdenti Donald Tramp Truth Social jelisinde pikir bildirdi.
Biraq birneshe saǵattan keıin Tramp Kırktiń qaza tapqanyn habarlady.
"Eshkim AQSH jastaryn Charlıdeı túsinip, sezine almady. Ony bárimiz, ásirese men, jaqsy kórip, qurmetteıtinbiz. Endi ol joq. Melanıa ekeýmiz onyń jary Erıkaǵa jáne búkil otbasyna qaıǵyryp kóńil aıtamyz", – dedi AQSH prezıdenti.
Belsendiniń qazasynan keıin Aq úı basshysy el aýmaǵyndaǵy barlyq jerde týdy 14 qyrkúıek, jeksenbi keshine deıin túsirýdi tapsyrdy.
Bastapqyda polısıa kúdiktini qolǵa túsirgenimen, keıin onyń atys jasaǵan adam emesin anyqtady. Keıinirek FBI basshysy Kesh Patel Kırkti óltirý isine baılanysty kúdikti ustalǵanyn málimdedi, biraq onyń aty-jóni jarıalanǵan joq.
Charlı Kırk týraly ne belgili?
Charlı Kırk – Donald Tramptyń jaqtasy, medıada jıi kórinip, túrli oqý oryndarynda dárister men pikirtalastar ótkizetin edi.
Aıta keteıik, 2024 jylǵy 14 shildede Donald Trampqa da qastandyq jasalǵan edi. Beımálim bireý Pensılvanıa shtatynda onyń mıtıńisi kezinde oq atqan. Tramp qulaǵynan jaraqat alyp, bir qatysýshy men atys bastaǵan adam qaza tapqan. Sondaı-aq sol jyldyń 12 qyrkúıeginde Florıdadaǵy gólf klýbynan shyqqan sátinde Trampqa taǵy oq atylǵan. Keıin polısıa klýb mańynda shatyr tigip, ony ańdyp júrgen kúdiktini ustaǵan.