Baǵdarlamalyq qamtamasyz etý ázirleýmen aınalysatyn Oracle kompanıasynyń basqarýshylardyń biri Larrı Ellıson Bloomberg mıllıarderler reıtıńinde birinshi orynǵa shyqty. Ol Tesla men SpaceX negizin qalaǵan Ilon Maskty basyp ozdy, - dep habarlaıdy Aqshamnews.kz RBK-ǵa silteme jasap.
Ellısonnyń baılyǵy 393 mıllıard dollarǵa, al Masktiki 385 mıllıard dollarǵa jetken.
"Ellısonnyń kúrt joǵarlaýy bir kúnde kapıtalynyń 101 mıllıard dollarǵa ósýi sebep boldy - bul Bloomberg reıtıńin júrgizý tarıhyndaǵy eń aýqymdy ósim", – delingen materıalda.
Bloomberg agenttiginiń tiziminde Mask shamamen bir jyl boıy birinshi orynda turǵan edi. Ol alǵash ret 2021 jyly kósh bastaǵan, biraq keıinnen Amazon negizin qalaýshy Djeff Bezos pen LVMH ıesi Bernar Arnoǵa jol bergen. Qazir olar sáıkesinshe tórtinshi jáne segizinshi orynda.
Shildeden bastap Ellıson Meta basshysy Mark Sýkerbergti artta qaldyryp, Bloomberg reıtıńinde ekinshi orynǵa jaıǵasqan bolatyn.
Forbes jýrnaly da Ellıson baılyǵynyń óskenin (102 mıllıard dollar nemese jalpy kapıtalynyń shamamen 35 paıyzy) atap ótti, onyń jalpy baılyǵyn 395 mıllıard dollar dep baǵalaıdy. Alaıda Forbes reıtıńinde Mask áli de birinshi orynda tur, onyń baılyǵy 437 mıllıard dollarǵa baǵalanǵan edi.
Ellıson baılyǵynyń ósýine Oracle aksıalarynyń kúrt qymbattaýy áser etti. Kompanıanyń qarjy esebinen keıin onyń baǵaly qaǵazdary bir jyl ishinde 45 paıyzǵa ósip, 9 qyrkúıekte tarıhı maksımýmǵa jetken, al sársenbide taǵy 41 paıyzǵa kóterildi.
Sondaı-aq kompanıa AQSH prezıdenti Donald Tramp qańtarda jarıalaǵan Stargate jasandy ıntellekt ınfraqurylymyn qurý jobasyna qatysyp otyr. Ellıson Respýblıkalyq partıany qoldaıdy.
Anyqtama: Larrı Ellıson – 81 jasta. Ol Oracle-dy 1977 jyly Bob Maıner jáne Ed Oýtspen birge qurǵan. Kompanıany 37 jyl basqarǵannan keıin, 2014 jyldyń qyrkúıeginde bas dırektor qyzmetinen ketip, dırektorlar keńesiniń tóraǵasy jáne tehnıkalyq dırektor boldy. Ol Oracle aksıalarynyń 40 paıyzdan astamyna ıe. Sonymen birge ol Paramount Skydance kompanıasynyń shamamen 50 paıyzyna ıelik etedi (onyń bas dırektory – uly Devıd). 2018–2022 jyldary Tesla dırektorlar keńesiniń múshesi bolǵan, qazir de kompanıanyń aksıalaryna ıelik etedi.