Almaty oblysynda "Altyn Orda" bazarynyń burynǵy atqarýshy dırektory sottaldy, - dep habarlaıdy almaty-akshamy.kz Almaty oblystyq sotynyń baspasóz qyzmetine silteme jasap.
"Altyn Orda" bazarynyń burynǵy atqarýshy dırektory Ermek Marqabaevqa 296-baptyń 4-bóligi "Esirtki, psıhotroptyq zattarmen, sol tektestermen ótkizý maqsatynsyz zańsyz jumys isteý" boıynsha aıyp taǵyldy.
Sot málimetinshe, byltyr jazda Almaty - Bishkek tasjolynda polısıa qyzmetkerleri artqy jolaýshylar oryndyǵynda sottalýshy otyrǵan avtokólikti toqtatqan. Jeke tintý kezinde onyń ishinde untaq zat bar baılam tabylyp, tárkilendi. Sot-hımıalyq saraptama nátıjeleri boıynsha bul zat psıhotropty zat bolyp shyqty - salmaǵy 1,796 gram bolatyn mefedron.
Prokýror sottalýshyny kináli dep taýyp, 5 jylǵa bas bostandyǵynan aıyrýdy surady. Sottalýshy óz kinásin moıyndamaı, aıǵaq berýden bas tartty.
"Sot jaza taǵaıyndaý kezinde sottalýshy M.-nyń balasynyń bolýyn qylmystyq jaýaptylyq pen jazany jeńildetetin mán-jaı retinde tanydy.
Qylmystyq jaýaptylyqty nemese jazany aýyrlatatyn mán-jaılar anyqtalǵan joq.
Sot úkimi boıynsha, M., QK-niń 296-baby 4-bóliginde kózdelgen qylmystyq quqyq buzýshylyqty jasaǵany úshin kináli dep tanylyp, oǵan 4 jyl merzimge bas bostandyǵynan aıyrý jazasy taǵaıyndaldy", - dep habarlady sottyń baspasóz qyzmeti.
Eske salaıyq, Ermek Marqabaev 2023 jyldyń maýsymda "Altyn Orda" mańynda ustalǵan bolatyn. Sodan keıin polıseıler tintý kezinde odan untaq pen tapansha tabylǵanyn habarlady.