«Altyn Orda» kópir qurylysy 2017 jyldan beri salynyp keledi
«Altyn Orda» bazary mańyndaǵy kópirdiń qurylysy qyrkúıek aıynda tolyq aıaqtalady. Bul týraly «QazAvtoJol» ulttyq kompanıasynyń resmı ókili arnamyzǵa bergen arnaıy suhbatynda málimdedi, dep habarlaıdy Almaty-akshamy.kz Almaty.tv-ge silteme jasap.
Qazir qurylystyń 85 paıyzy bitken. Endi tek asfált jabyndylaryn tóseý qalypty.
Toǵyz joldyń torabynda ornalasqan «Altyn Orda» kópir qurylysy 2017 jyldan beri salynyp keledi. Sabyry synalǵan júrgizýshiler qurylysy sozylǵan kópirden ótýi úshin saǵattap kepteliste turamyz dep shaǵym aıtady.
«Osy kópirdi jeti jyl saldy ǵoı. Ázir bilinbeıdi, keshke kórseńiz, asty da, ústi de keptelis», – dedi qala turǵyny Mereı Jumabekov.
Qalaǵa kirip-shyǵatyn jol qurylysynyń kesheýildeýine Prezıdent nazar aýdaryp, tıisti taraptarǵa tapsyrma bergen bolatyn.
«85% jumys bitken. Qazirgi ýaqytta asfált-beton salý jumysy qaldy. Avtobýs, tranzıttik jolaq bolady. Sol jumystar bitkennen keıin 2 aıdyń ishinde asfalt salyp bitemiz», – dedi «QazAvtoJol» UK» AQ Almaty oblystyq fılıaly dırektorynyń orynbasary Nurjan Tańatarov.
Alaıda mundaǵy jurt ýádege senýden qalǵan. Daýly qurylysqa buǵan deıin jaýapty bolǵan kompanıa sózinde turmady deıdi.
«Ýádesine men senbeımin. Óıtkeni boldy ananyń ústin jóndeımiz dep ótkizgen shala-pula sol kúıi qaldy. Qaıtadan remonttap jatyr. Endi ony ne deýge bolady», – dedi qala turǵyny Asqat Igisinov.
Al «Altyn Orda» kópirin qosa alǵanda respýblıkalyq mańyzy bar joldardy tekserýge kelgen «QazAvtoJol» ulttyq kompanıasynyń resmı ókili, buǵan deıingi olqylyqtardyń ornyn toltyramyz dep otyr. Aıtýynsha, buǵan deıingi qurylysqa jaýapty merdigerdiń qateligi jolaıyryq jumysyna kesirin tıgizgen.
«Elimizde jalpy qurylysy uzaqqa sozylǵan dep tanylǵan birqatar kúre joldardyń jumysy qaıta jandandy. Altyn ordany salǵan merdiger uıym, jumysyna salǵyrt qaraǵandyqtan olarmen kelisimshart buzyldy, jańa merdiger uıym kelip jatyr. Olar 5 aıdyń ishinde «Altyn Ordanyń» kópirin salyp berdi», – dedi «QazAvtoJol» UK» AQ baspasóz hatshysy Lázzat Stamǵazıeva.
Jańa merdiger kompanıa qurylys jumystaryn merziminde aıaqtaý úshin 200-den asa adam jaldapty. Al, ýaqytsha qıyndyqtarǵa túsinistik tanytýylaryn suraıdy.