Qazaqstan quramasy Chernogorıanyń Býdva qalasynda ótken bokstan jastar arasyndaǵy álem chempıonatynda tarıhı jeńiske qol jetkizdi, dep habarlaıdy aqshamnews.kz
Býdvada ótken jastar arasyndaǵy álem chempıonatynda qazaqstandyq boksshylar 6 altyn medal ıelenip, burynǵy rekordtardy jańartty. Buǵan deıin Qazaqstan qurama komandasy eń kóp degende 2 altyn medalǵa ıe bolǵan edi: 2018 jyly Vengrıada jáne 2021 jyly Germanıada ótken jarystarda elimiz 2 altynmen oralǵan bolatyn. Al osy chempıonatta Qazaqstannyń ánurany 6 ret shyrqaldy. Aqtyq synnyń alǵashqy kúninde 67 kelidegi qurama kapıtany Tórehan Sabyrhan, 75 keli salmaqta Sanjaráli Begalıev jáne 81 kelide Arýjan Zeınollaeva altyn medal enshilese, ekinshi fınal kúni 51 kelidegi Boranbek Beksultan, 71 kelidegi Óner Seıilhan jáne 50 kelidegi Elánur Turǵanova chempıon atandy.
Jalpy esepte 17 medalmen birinshi oryndy ıelengen Qazaqstan quramasynyń qorjynynda 6 altyn, 1 kúmis jáne 10 qola medal bar. Ekinshi orynǵa Ózbekstan quramasy jaıǵassa, úzdik úshtikti Reseı boksshylary túıindep tur.
Sonymen qatar, Halyqaralyq boks qaýymdastyǵy jeńimpazdar men júldegerlerge aqshalaı syıaqy taǵaıyndady: altyn medal ıegerlerine – 8 myń dollar, kúmis medal ıegerlerine – 4 myń dollar, qola medal ıegerlerine 2 myń dollardan tabystady.