Úzdik aıtyskerge bes mıllıon teńge buıyrady
Shyǵys Qazaqstan oblysy Katonqaraǵaı aýdanynda ótetin "Altaıdaı jer qaıda?" atty halyqaralyq aıtysqa 16 aqyn qatysady, dep habarlaıdy Almaty-akshamy.kz inbusiness.kz-ke silteme jasap.
Altaı taýynyń baýraıynda ótetin halyqaralyq aıtysqa Qazaqstan, Ózbekstan, Qyrǵyz jáne Mońǵolıa elderiniń aıtysker aqyndary qatysady. Elimizden Bekarys Shoıbekov, Muhtar Nıazov, Rınat Zaıytov, Erkebulan Qaınazarov, Rústem Qaıyrtaı, Ásem Ereje, Shuǵaıyp Sezimhan, Qalıjan Dildashev, Qaziret Berdihan, Jarqyn Juparhan, Serik Qýanǵan, Ardabek Aqbaba syndy aqyndar baq synaıdy. Aqyndardyń ónerine Almas Ahmetbek, Ulyqbek Esdaýlet, Serik Qusanbaev, Serik Qalıev, Dáýletkereı Kápuly men Kámel Júnistegi qazylyq etedi. Aıtysty belgili aqyn, Qazaqstannyń eńbek sińirgen qaıratkeri Júrsin Erman júrgizedi.
Aıtys 1 shildede saǵat 10:00-de Katonqaraǵaı aýylyndaǵy ortalyq saıabaqta bastalady. Alǵash ret uıymdastyrylyp otyrǵan halyqaralyq aıtystyń jalpy júlde qory 13 mln teńgeden asady, úzdik aıtyskerge bes mıllıon teńge buıyrady.
Aıtys eki kezeńnen turady – irikteý jáne fınal. Maqsaty babadan jalǵasqan ulttyq aıtys ónerin ulyqtap, Altaı taýynyń kórkemdigin dáripteý.