Profılaktıkalyq medısına akademıasynyń prezıdenti, Amerıka densaýlyq saqtaý qaýymdastyǵynyń múshesi Almaz Sharman vaksınasıadan keıingi janama áserlerden qorqý naızaǵaıdan qorqyp, jaýyndy kúni kóshege shyqpaýmen birdeı áreket degen oı aıtty, dep habarlaıdy almaty-akshamy.kz QazAqparat tilshisine silteme jasap.
«Koronavırýs - búginde aldyn alýǵa bolatyn aýrý. Vaksına 100 paıyz bolmasa da, koronavırýs ınfeksıasynan, syrqattyń aýyr ótýinen qorǵaıdy. Búginde álemde túrli vaksınalardyń 4 mlrd dozasy egildi. Árıne, vaksınanyń ózi vırýs týdyrmaıdy jáne vaksına alǵandar is júzinde kovıdten ólmeıdi. Vaksınany 100 paıyz qaýipsiz dep te aıta almaımyz. Óte sırek jaǵdaılarda olar alergıalyq reaksıa nemese qannyń uıýy sıaqty janama áserlerdi týdyrýy múmkin. Mundaı reaksıalar vaksına alǵan 50 myń adamnyń bireýinde ǵana kezdesedi. Bul yqtımaldylyqty naızaǵaı túsýi yqtımaldyǵymen salystyrýǵa bolady. Bul óte sırek kezdesedi», - dep túsindirdi sarapshy.
Sonymen qatar, ol vaksına almaǵan ár besinshi adam qan uıý qaýpine shaldyǵatynyn aıtty.
«Bul qaýiptiń yqtımaldyǵy vaksına alǵannan keıingi yqtımaldyqtan myń ese joǵary. Vaksınalar jańa týǵan nárestelerde reprodýktıvtik aýytqýlar men deformasıalardyń damýyna ákelmeıdi. Kerisinshe, kovıdpen aýyratyndar bedeýliktiń, shala týylýdyń, sondaı-aq mıdyń, júrektiń, basqa organdardyń sozylmaly syrqatynyń, onyń ishinde aqyl-oı qabiletiniń tómendeýiniń úlken qaýpine ushyraıdy», - dedi Almaz Sharman.