Almaty qalasy boıynsha «Qazaqstannyń úzdik taýary» óńirlik kórme-baıqaýy ótti.
Baıqaýǵa 80-ge jýyq almatylyq kompanıa ótinim berdi. Bıyl kórme QR Tuńǵysh Prezıdenti saıabaǵynda uıymdastyryldy, dep habarlaıdy Almaty-akshamy.kz.
Qaz qatar tizilgen aq shatyrlar otandyq ónimniń túr-túrin qala turǵyndary men qonaqtaryna usyndy.
Azyq-túlik ónimderi, ulttyq naqyshtaǵy buıymdar, kıim, aıaq kıim, kórpe-jastyqtan bastap, kabel, jıhaz, adamnyń qan qysymy men jalpy jaı-kúıin birden anyqtaıtyn joǵary tehnologıalyq apparattar qoıyldy.
«Dástúrge aınalǵan «Qazaqstannyń úzdik taýary» kórme baıqaýy almatylyq óndirýshiler úshin jylsaıynǵy mereke ispetti. Kórme arqyly qala turǵyndary men qonaqtary otandyq ónimderdi kóredi, joǵary sapadaǵy taýarlardy ózindik qunmen satyp alýǵa múmkindik alady. Kásipkerler bir-birimen tanysady, naryqtaǵy áleýetti, básekelesterdi baǵalaıdy, ózara iskerlik baılanys ornatady. Búgin kórmege balalaryn ertip kelgen otbasylardyń kóptigi qýantty», – dedi Almaty qalasy kásipkerler palatasynyń basqarýshy dırektory Narıman Ibragımov.
Mynadaı úsh nomınasıa boıynsha «Óndiristik maqsattaǵy úzdik taýarlar», «Halyqqa arnalǵan úzdik taýarlar taýarlar», «Úzdik azyq-túlik taýarlary» úzdik taýar óndirýshiler anyqtaldy. Jeńimpazdardy jergilikti atqarýshy organdar, bıznes-qoǵamdastyq, kásipkerler palatasy janyndaǵy óńirik keńestiń múshelerinen qurylǵan arnaıy komısıa anyqtady. Ár nomınasıa boıynsha 3 jeńimpaz irikteldi. Óńirlik irikteýdiń jeńimpazdary jyldyń sońynda QR Prezıdentiniń qatysýymen ótetin respýblıkalyq baıqaýǵa qatysady.
Almaty qalasy kásipkerlik jáne ınvestısıalar basqarmasynyń málimetinshe, ońtústik astana – Qazaqstandaǵy kásipkerlik bastamanyń ortalyǵy. Qalada óńirlik ekonomıkanyń jartysynan astamyn (53,9%) quraıtyn shaǵyn jáne orta bıznes damyǵan. Onda 871,9 myń adam nemese ekonomıkalyq belsendi halyqtyń 79,5%-y jumys isteıdi.
«Búgingi tańda shaǵyn jáne orta bıznes qala ekonomıkasynyń irgetasy ispetti. Qalada barlyǵy 380 myń shaǵyn jáne orta kásipkerlik sýbekti tirkelgen. Bul 2022 jylmen salystyrǵanda 22%-ǵa joǵary kórsetkish (312 784 birlik). Jumys istep turǵan SHOK sýbektileriniń sany 323 083 birlikti quraıdy. Bul 2022 jyldyń uqsas kezeńinen 39%-ǵa joǵary (233 030 birlik). Respýblıka boıynsha jumys istep turǵan SHOK sýbektileriniń jalpy sanyndaǵy Almatynyń úles salmaǵynyń shamamen 16,2% quraıdy, sol arqyly osy kórsetkish boıynsha megapolıs jyl saıyn Qazaqstan boıynsha birinshi oryndy alady», – dep atap ótti Almaty qalasy Kásipkerlik jáne ınvestısıa basqarmasynyń jetekshisi Berik Soltanbaev.
Kórme-baıqaýǵa kelgen qonaqtarǵa arnap konserttik baǵdarlama jáne baǵaly syılyqtar utysy uıymdastyryldy.
«Sapa salasyndaǵy bedeldi baıqaýǵa ekinshi ret qatysyp jatyrmyz. Bizge óz salamyzda úzdik bolý, basqa áriptestremn tanysý mańyzdy. Byltyr «İsker» nomınasıasynda úzdik atandyq. Jalpy ınovasıalyq tehnologıalar salasynda ilgerileý bar, osy baǵtyń damýyna úles qosyp jatqanymyzǵa qýanyshtymyn. Otandyq óndirýshilerdi qoldaıtyn osyndaı kórmeler jylyna birneshe ret ótkizilýi kerek dep sanaımyz», – dedi «Med365» JSHS dırektory Shyńǵys Qulahmetov.
Sondaı-aq, alǵash ret «Qazaqstannyń úzdik taýary» kórme-baıqaýy aıasynda jergilikti shıkizattan óndirilgen «Bir aýyl – bir ónim» jobasyna qatysýshylardyń ónimderi usynyldy. Baıqaý qolónershilerdi ynlatandyrý, myqty sheberlerdi anyqtaýǵa baǵyttalǵan. Qolónershiler etnıkalyq stılinde toptamalar, qysh, saz, metal, kıiz jáne jibekten jasalǵan buıymdar, zergerlik buıymdar men kádesyılardy kópshilik nazaryna usyndy.
Aıta ketıik, «Bir aýyl – bir ónim» jobasy kásipkerlikti damytý jónindegi 2021-2025 jyldarǵa arnalǵan ulttyq joba sheńberinde qurylǵan «Men kásipker» baǵdarlamasynyń quraýyshy.
Baıqaý komısıasynyń sheshimimen «Óndiristik maqsattaǵy úzdik taýarlar» nomınasıasynda adamnyń qan qysymy men jalpy jaı-kúıin birden anyqtaıtyn joǵary tehnologıalyq apparattardi óndiretin «Meb365» JSHS, Qubyrlarlarǵa esep aspaptary jáne qosalqy bólshekterdi shyǵaratyn «Qazaqstan qubyr júrgizý júıeleri» JSHS, Keramıkalyq granıt, tabıǵı tas óndiretin «City stone» JSHS úzdik atandy.
«Halyqqa arnalǵan úzdik taýarlar taýarlar» nomınasıasynda Turmystyq hımıa ónimderiniń keń spektrin óndiretin «Microhim» JSHS, bıo tyńaıtqyshtar, tórt-túlikke arnalǵan bıologıalyq qospalardy óndirýshi «Black biotechnology» JSHS, jylý saqtaý, oqshaýlaǵysh materıaldardy shyǵaratyn «Teplostil» JSHS top jardy.
«Úzdik azyq-túlik taýarlary» nomınasıasynda fast-fýd ónimderin daıyndaıtyn «Red Dragon Almaty» JSHS, tabıǵı shyryndar, kompot, sýsyn óndirýshi «Sharyn shyryny» jeke kásipkerligi, organıkalyq azyq-túlik ónimderin óndiretin «Organic foods» JSHS jeńiske jetti.
Bul kompanıalar ońtústik astananyń bedelin respýblıkalyq deńgeıde ótetin baıqaýda qorǵaıtyn bolady.
«Bir aýyl – bir ónim» baıqaýynda qatysýshylar irikteýdiń baǵalaý kezeńinen ótti. Baıqaý jeńimpazdary komısıanyń daýys berýinen soń 10 kúnnen keıin jarıalanady.