Qazirgi ýaqytta uzyndyǵy 15 shaqyrymnan asatyn 21 kóshede jumystar aıaqtaldy.
Qalalyq Mobıldilik basqarmasynyń basshysy Ǵanı Myrzahanovtyń málimdeýinshe, bıyl Dýman shaǵyn aýdanyndaǵy 30 shaqyrymnan astam jol kúrdeli jóndeýden ótedi, dep habarlaıdy Almaty-akshamy.kz
Spıkerdiń aıtýynsha, bul kóshelerde jańa asfált, aryqtar men trotýarlar paıda bolady. Sonymen qatar, Almatyda qalǵan 38 kóshede (uzyndyǵy 15,1 km) jóndeý jumystaryna daıyndyq júrip jatyr. Jumystardy aǵymdaǵy jyldyń qyrkúıek aıynyń sońyna deıin aıaqtaý josparlanýda.
Ǵanı Myrzahanov almatylyq jol salýshylar asfált tóseýde tehnologıanyń eki túrin – usaq túıirshikti jáne qıyrshyqty mastıkalyq asfáltty qoldanatynyn aıtty.
QMB basshysy qarasha aıynda Taýsamaly shaǵyn aýdanyndaǵy Qonaev kóshesin Iassaýı kóshesinen Rysqulov kóshesine deıin (uzyndyǵy1,2 km) rekonstrýsıalaýdy aıaqtaý qarashaǵa josparlanǵanyn aıtty.
«Qazirgi ýaqytta úsh jol aıryǵynyń qurylysy júrgizilýde. Bıyl Rysqulov dańǵyly - Emsov kóshesiniń qıylysyndaǵy jol aıryǵynda kólik quraldarynyń qozǵalysyn ashý josparlanýda, kelesi jyly Seıfýllın dańǵyly - Jansúgirov kóshesi, Buqtyrma kóshesi - Qulja traktisindegi jolaıryqtaryn iske qosý josparlanýda», - dep atap ótti Ǵanı Myrzahanov.
Spıker tórt kósheni úńgileý týraly da aıtty. Jyl sońyna deıin Abaı dańǵyly, Alataý kóshesi men Áýezov kóshesi boıynda qurylys-montaj jumystaryn aıaqtap, kólikter qozǵalysyn ashý josparlanýda. 2023 jyly Saıyn kóshesindegi jumysty aıaqtaý josparlanýda.
Sonymen qatar, aǵymdaǵy jyly Alataý, Túrksib jáne Naýryzbaı aýdandarynyń segiz shaǵyn aýdanynda (Ójet, Shańyraq-5, Samǵaý, Alǵabas, Nurshashqan, Álmerek, Qaırat, Quramys shaǵyn aýdandarynda) jol salý boıynsha jumystar júrgizilýde, onyń ishinde uzyndyǵy 108 km bolatyn 415 kóshede. Búgingi kúni uzyndyǵy 35 km bolatyn 132 kóshede jol qurylysy aıaqtaldy. Aǵymdaǵy jyldyń sońyna deıin 75 shaqyrym joldy aıaqtaý josparlanýda.
Ǵanı Myrzahanov basqarmanyń Almatydaǵy barlyq kóshelerdiń, ásirese magıstraldy kóshelerdiń jaǵdaıyn muqıat baqylap otyratynyn atap ótti.
«Biz ár 5 jyl saıyn jol jamylǵysyn aýystyramyz. Kólik jyldamdyǵy joǵary magıstraldy kósheler muqıat baqylaýda. Bul joldar erekshe nazardy qajet etedi. Biz jyl saıyn aǵymdaǵy, ortasha nemese kúrdeli jóndeý qajettiligin anyqtaımyz. Aǵymdaǵy jóndeý jaǵdaıynda kishigirim kemshilikterdi joıamyz, jamaýdy júrgizemiz, jarylýlardy jóndeımiz. Ortasha jóndeýmen bastapqy kúıine jetkizemiz. Bul kólemi jóninen eń úlken jóndeý», - dedi Ǵanı Myrzahanov.
QMB basshysy baǵdarshamdardyń jaǵdaıy týraly da aıtty. Búginde Almatyda olardyń sany 450. Byltyr 93-i modernızasıalandy, al keler jyly taǵy 300 baǵdarsham jańaratyn bolady.
2021 jyldyń sońyna deıin 34 baǵdarsham ornatylady, 70 retteletin jaıaý júrginshiler ótkelin jáne 70-ke jýyq rettelmeıtinderin jaryqtandyrý josparlanýda.