Naýryzbaı aýdany ınjenerlik ınfraqurylymdy jańǵyrtyp jatyr. Aqjar yqsham aýdanynda sý qubyry men káriz júıesiniń taratatyn jelilerdi salýdyń ekinshi kezeńi bastaldy. Óńirlik komýnıkasıalar qyzmeti men aýdan ákimdigi birlesip uıymdastyrǵan pres-týr barysynda jýrnalıser osy jumystyń barysymen tanysty.
Byltyrǵy shilde aıynda bastalǵan jobada 43,7 shaqyrym sý qubyry men 38,7 shaqyrym káriz jelisi tartylmaq. Jalpy quny 3,9 mıllıard teńgeni quraıtyn qurylys jumystaryn osy kúzge deıin aıaqtaý josparlanǵan.
«Qazir yqsham aýdannyń 52 kóshesinde qurylys aıaqtalyp, 37 shaqyrym sý qubyry men 35 shaqyrym káriz qubyry tartyldy. Kún saıyn bul nysanǵa 7-8 qurylys brıgadasy men 20-dan astam arnaıy tehnıka jumyldyrylady», - deıdi Naýryzbaı aýdany ákiminiń orynbasary Jandos Tákibaev.
Bul aýdandaǵy júzege asyryp jatqan alty aýqymdy ınfraqurylymdyq jobanyń biri ǵana. Birinshi kezeń aıasynda Aqjar yqsham aýdanynda 3 shaqyrymnan astam ınjenerlik jeliler salynǵan, al qurylys jumysy 2025 jyldyń shilde aıynda aıaqtalmaq. Úshinshi kezeńde 12,7 shaqyrym káriz ben 16,2 shaqyrym sý qubyry jelisi taǵy salynady.
Qaraǵaıly yqsham aýdanynda birinshi kezeńniń jumystary aıaqtalyp, 4,2 shaqyrym sý qubyry men 2,1 shaqyrym káriz qubyry tartylǵan. Sonymen qatar, uzyndyǵy 35 shaqyrym bolatyn batys káriz kolektory salynyp jatyr, bul Naýryzbaı jáne Alataý aýdandarynyń 175 myń turǵynyn ortalyqtandyrylǵan káriz júıesine qospaq. Qaraǵaılynyń ońtústik-shyǵys bóliginde de magıstraldy káriz jelisin tartyp jatyr.
«Osy jobalar jańa jáne belsendi damyp kele jatqan Almatydaǵy yqsham aýdandardyń on myńdaǵan turǵynyn sý qubyry men káriz qyzmetimen qamtamasyz etýge baǵyttalǵan», - dep atap ótti Jandos Tákibaev.
Bular Naýryzbaı aýdanynda turaqty ınfraqurylymdyq bazanyń qalyptasýyna múmkindik berip, turǵyndardyń ómir sapasyn arttyrmaq.