Almaty ákimi Erbolat Dosaev jumys sapary barysynda Naýryzbaı aýdanyndaǵy Shuǵyla shaǵyn aýdanynda jańadan salynǵan balabaqshany qarap shyqty.
320 oryndyq mektepke deıingi uıymnyń qurylysy 2022 jyldyń mamyrda bastalǵan bolatyn. Joba eki bólikke bólindi – ǵımaratty turǵyzý jáne aýmaqty kóriktendirý men ınjenerlik jelilerdi salý. Alaıda merdiger uıymdardyń sharttyq mindettemelerin oryndamaýyna baılanysty jobanyń iske asý merzimi keshikti.
Osyǵan baılanysty Qurylys basqarmasy «Astana-Stroıınvest» korporasıasy JSHS jáne «Teploenergostroı» JSHS-ǵa qatysty memlekettik satyp alýlarǵa mindetine salǵyrt qaraıtyn jaýapsyz qatysýshy dep taný jáne aıyppul óndirý týraly sot talaptaryn berdi. Birinshi merdigerge qatysty talap-aryz tolyq qanaǵattandyryldy, al ekinshi talap qaralýda.
Qazirgi ýaqytta balabaqshanyń qurylysy men ishki árleý jumystary tolyǵymen aıaqtaldy, aýmaq abattandyrylyp, qajetti jabdyqtar ornatyldy. Sondaı-aq, barlyq ınjenerlik jeli tartylyp, qosylǵan. Iaǵnı, nysan tolyq aıaqtalyp, paıdalanýǵa berý rásimderi júrgizilýde.
Ǵımaratta balalarǵa arnalǵan arnaıy oqý oryndary, sonyń ishinde gımnastıka jáne mýzyka sabaqtaryna arnalǵan zaldar, sondaı-aq qyzmetkerlerge arnalǵan bólmeler qarastyrylǵan. Josparlaý sheshimderi ártúrli toptardyń bir-birinen jáne ákimshilik-sharýashylyq bólmelerden barynsha oqshaýlaný qaǵıdasyn qamtamasyz etedi.
Nysandy tekserý qorytyndysy boıynsha qala basshysy qurylys jáne bilim berý basqarmalarynyń basshylyǵyna birqatar kemshilikti kórsetip, olardy qysqa merzimde joıýdy júktedi.
«Aýdan belsendi damýda jáne jaqyn mańdaǵy úılerdiń turǵyndary úshin áleýmettik ınfraqurylymnyń qoljetimdiligin qamtamasyz etý maqsatynda osy shaǵyn aýdanda taǵy bir balabaqsha salý týraly sheshim qabyldandy. Halyq onyń ashylýyn kútip otyr, sondyqtan barlyq eskertýdi jedel túrde joıyp, jyl sońyna deıin balabaqsha balalardy qabyldaı bastaý kerek», – dedi Erbolat Dosaev.
Aıta ketý kerek, Naýryzbaı aýdanynda 148 balabaqsha jumys isteıdi. Kelesi jyly oryn tapshylyǵyn azaıtý maqsatynda taǵy eki 320 oryndyq balabaqshanyń qurylysyn aıaqtaý josparlanyp otyr.