Qalada jyldyń úzdik ustazy anyqtaldy
Respýblıkalyq «Qazaqstan muǵalimi-2021» ulttyq syılyǵy osymen úshinshi ret ótkizilip otyr. Baıqaýdyń marapattaý rásimi saltanatty túrde atalyp ótti. Jeńimpaz fınaldyq kezeńge ótken on laýreattyń ishinen anyqtaldy. Jyldyń úzdik ustazy 4 mln teńge qarjylaı júldege ıe boldy. Endi ol «Álem muǵalimi» baıqaýyna qatysady, dep habarlaıdy Almaty-akshamy.kz.
Almaty.tv saıtynyń málimetterine sáıkes,«Qazaqstan muǵalimi-2021» ulttyq syılyǵyna 300-den astam úmitkerden ótinim kelip túsken. Olardyń arasynan ozyq shyqqan 10 pedagog fınaldyq kezeńge ótti. Úzdik ustazdy anyqtaýdaǵy negizi talap – muǵalimniń áleýmettik isterge qatysýy nazarǵa alynady. Halyqaralyq baıqaý elimizde qoǵamdyq mańyzy bar bastamalardy damytý qorynyń uıymdastyrýymen ótti.
«Qurmetti dostar, búgingi baıqaýdyń fınalısteri, men sizdermen maqtanamyn. Búgingi jeńispen shyn júrekten quttyqtaımyn. Barlyq muǵalimge zor densaýlyq jáne shyǵarmashylyq tabys tileımin», – dedi Qoǵamdyq mańyzy bar bastamalardy damytý qorynyń quryltaıshysy Álıa Nazarbaeva.
Elimizdiń túkpir-túkpirinen jıylǵan úzdik ondyqtyń arasynan almatylyq Alla Býrenkova úzdik shyqty. Ol qalalyq №42 mektepte mýzyka páninen dáris beredi. Búginge deıin sabaq ótkizý barysyndaǵy erekshe ádistemeleri halyqaralyq basylymdarda jarıalanyp júr. Shákirtteri ǵylymı saıystardyń jáne halyqaralyq olımpıadalardyń jeńimpazdary atanyp úlgergen. Endi ol aldaǵy jyly ótetin «Álem muǵalimi» baıqaýyna joldama aldy. Halyqaralyq konkýrstyń júlde qory 1 mln AQSH dollaryn quraıdy.
«Shynymdy aıtsam, men bul júldeni jeńip alamyn dep oılamap edim, áli de sene almaı turmyn. Bul konkýrs shynymen de, muǵalimderdiń tájirbıesimen jáne qundylyqtarymen tanysýǵa múmkindik beredi», – deıdi «Qazaqstan muǵalimi-2021» ulttyq syılyǵynyń ıegeri Alla Býrenkova.
Asqat Jumabekov – Semeıdegi Nazarbaev zıatkerlik mektebeniń muǵalimi. Ótken jyly jahandyq syılyqtyń fınalısi atanyp, álemniń úzdik 50 muǵaliminiń qataryna qosylǵan. Bul – tarıhı oqıǵa, óıtkeni buryn-sońdy elimizden birde-bir pedagog atalǵan syılyqqa úmitker bolmaǵan.
«Zamanaýı muǵalim árqashan izdenis ústinde júrip, ózin jetildirip otyrýy kerek. Oqýshylardyń ǵylymı jumystarymen aınalysýyna jaǵdaı jasaýy qajet. Jeke ustanymym da osy. Sabaqtarymdy tájirıbe negizinde ótkizýge tyrysamyn», – dedi Global Teacher Prize halyqaralyq syılyǵynyń nomınanty Asqat Jumabekov.
Atap ótken jón, Global Teacher Prize – Nobel syılyǵynyń balamasy. Tek ustazdarǵa beriledi. Úmitkerlerdiń eńbegin táýelsiz sarapshylardan quralǵan pedagogıkanyń jetekshi mamandary, qoǵam qaıratkerleri jáne ata-analar qaýymdastyǵynyń ókilderi baǵalady. Elimizde mundaı ulttyq syılyqty ótkizý dástúrge aınalmaq.